皮雅斯布士南+Hackett London= 快樂的紳士

身為大忙人的Brosnan，日前越洋接受本報專訪，談笑風生的Brosnan自言最大快樂來自家庭：「我鍾意同家人喺居住嘅小島上面打golf、游水同行山，日落時海豚仲會陪住我哋。」為了享受家庭樂，貴為大明星的Brosnan又會落手落腳製作palapa（棕葉棚舍），他笑說：「我屋企外面有個palapa，我會坐喺度歎世界，個palapa係我自己整o架，囝囝都有幫手。有時就同老婆喺度一齊睇日落，星星一出現，我哋就喺海灘點起火堆，然後歎酒。」這種簡單的生活，正是Brosnan的快樂泉源。

家庭是工作動力

家庭亦是Brosnan努力工作的推動力，他透露未來工作已排得密麻麻：「年尾會開拍兩套喜劇，分別係東妮歌妮（Toni Collette）同Aaron Paul主演嘅《A long Way Down》、愛瑪湯遜（Emma Thompson）主演嘅《Love Punch》，依家就製作緊自己公司嘅《November Man》。之後我會去夏威夷度假一個月，返嚟再開拍同姬絲汀史葛湯瑪士（Kristin Scott Thomas）、謝茜嘉艾芭（Jessica Alba）合作的劇情片《How To Make Love Like An Englishman》。」提到最欣賞的電影，他就揀選《教父》（The Godfather）、《豪情蓋天》（Unforgiven）與《黑金風雲》（There Will Be Blood）。

心目中兩位英雄

此外，談到今次與品牌合作的宣傳照，由著名攝影師Terry O'Neill親自操刀，Brosnan即大讚O'Neill做得很好，至於最喜歡哪一張照片？他就表示每一張都很喜歡：「其實我一直好欣賞O'Neill，佢曾經同我心目中兩位英雄合作，辛康納利（Sean Connery）同史提夫麥昆（Steve McQueen），依家到我同佢合作，咁係一個非常好嘅挑戰，令我好難忘！」

男士英式西裝

Hackett London成立於1983年，初期只是一家販賣二手服飾的小店，至1985年正式推出自家品牌服裝，並一直大走傳統英倫風格，為男士帶來英式西裝。而Polo恤、針織冷衫、格紋和Old School運動服飾亦是品牌的拿手好戲。

品牌創業至今僅三十多年，業務已在歐洲火速擴展，近年更拓展至香港，令港迷可以近距離一嘗英國紳士風格。

60年攝影經驗

Terry O'Neill出生於1938年7月30日，他是英國著名攝影師，擁有60年攝影經驗的他最擅長捕捉人物的氣質和魅力。在他的鏡頭下，每位人物都呈現最自然的一面。此外，Terry O'Neill在60年代曾與當時得令的英國樂隊Beatles（披頭四）、Rolling Stones（滾石樂隊）等合作，更曾獲得英國皇家攝影學會頒授百周年紀念勳章，以表揚他對攝影界的貢獻。

文：李惠儀