1：16張國榮繼續熱捧
「我覺得藝人做到最高境界係可以男女兩個性別同在一個人身上，藝術本身係沒有性別的。」哥哥張國榮如是說。於2000年《熱‧情演唱會》，在台上演繹《大熱》一曲，將男性嫵媚發揮得淋漓盡致。貴為「哥哥」忠實粉絲的Hot Toys主腦Howard，當然沒有忘記這一幕，決定將其化為1:6 Figure，讓大家繼續寵愛張國榮。
呈現百變形象
眾所周知，Hot Toys「選角」很大程度反映其主腦Howard的喜好，迷上哥哥30多年的他，今年初終於從哥哥前經理人陳淑芬女士手中取得肖像權，隨即以短短3個月時間，火速製作出首個致敬作品──1:6「踢死兔」張國榮。雖然坊間口碑、銷量雙贏，但神似度仍有改善空間意。為了精益求精，廠方遂以更多時間開發第二炮，即今次的《大熱》版本，正好呈現哥哥的百變一面。
植髮更易梳理
當年的演唱會，哥哥束了一頭及腰長髮，時而隨舞飄揚，時而綰成髮髻，經典成咁，廠方當然跟到足，特別以植髮取代傳統膠髮處理，髮絲順直到猶如做了「負離子」一樣，因此梳理時容易得多。頭雕方面，鑑於亞洲人輪廓偏淺的關係，哥哥的製作難度確實比外國影星高出不少，幸好大師Yulli有了上次經驗，新作的五官、輪廓落刀更見神似，憂鬱眼神配合JC. Hong塗裝，亦見細膩。
藍燈紅館舞台
除了長髮，出自法國名師Jean Paul Gaultier的歌衫，時至今日依然是劃時代設計。轉化為1:6比例後，歌衫改由韓籍裁縫Hai Lim主理，此君看過歌衫照片後，極力使服裝的用色、剪裁跟足當年模樣，並改以幻彩布仿製那件銅色外套，還在四邊加入鐵線，輕輕一扭即能擺出「隨風飄動」效果！配件貴精不貴多，8隻造型手及Mic Stand當然唔少得，最正係地台模仿番舞台設計，中間有藍色LED燈射住，唔講仲以為去咗紅館呢！
撰文︰陳志滔
攝影︰陳世昌
查詢電話︰2388 4677