沙灘競賽! 紮木筏Team默契
踏入暑假，唔少學生哥一係出街玩到癲，一係上網喪打機，與其燃燒青春，不如約埋班Friend去吸收正能量！
別以為小記講緊宿營、BBQ等悶嘢，今次帶大家到大嶼山玩Team Building團隊遊戲，透過踩木蹺、紮木筏等玩意，訓練團隊合作和領導才能。既有專人籌備活動，各位又可以扮《人在野》扒木筏，少啲默契都玩唔掂！
度身訂造遊戲
每年夏天，總有不少水上活動愛好者到大嶼山浪高長岸（Long Coast Seasports）玩風帆、滑水等，但很少人知道這裏原來有得玩Team Building。話明係團隊遊戲，最少要12人參與，以便分成兩隊競賽，活動策劃人兼教練Kenji指：「我哋會因應參加人數、大人細路比例、濕唔濕身等元素設計遊戲，所以有興趣的話最好一星期前預約。而每次Team Building會有3個遊戲，歷時約90分鐘，當然玩之前我哋會進行Briefing講解玩法，等大家玩得更Free。」當中最受歡迎的遊戲有大腳八、注滿水柱和紮木筏等，究竟點先至Teamwork成功？一於等Kenji教路。
Game1：大腳八 講求合作
大腳八不但年輕人玩得，就算一家大細都可以齊齊落場，主要講求合作性。玩法是利用木方，讓眾人企上去拉住繩索，以二人三足形式走到終點。Kenji表示：「大腳八需要成Team人嗌拍子，一齊起左腳或右腳，竅門係雙腳應該夾埋少少，否則變成大字形就好難行。」
Game2：注滿水柱 眼明手快
而注滿水柱遊戲亦唔簡單，岸上會有一條穿晒窿嘅膠柱，裏面放入一個乒乓波，參加者要利用水桶載住水，拋畀隊友倒入膠柱，務求將佢注滿而擠出乒乓波。但由於膠柱有好多窿，其他隊友要想辦法堵塞這些小孔，Kenji稱：「呢個遊戲講求眼明手快，重點係拋桶、倒水時要準確，唔好浪費每一滴水。」
Game3：木筏DIY 橫渡海洋
經過兩輪激鬥，緊接着是壓軸嘅紮木筏，需要喺限時內完成木筏製作，Kenji表示：「紮木筏的材料有4個大膠桶、8支竹和20條繩，竅門是先將兩支竹固定於膠桶上方，紮好一邊才紮另一邊，完成後再將餘下的竹放上並紮成井字形；最緊要紮得夠實，以及利用雙套結、方回結和平結等繩結技巧，如果唔係出到海好易散，這遊戲還可訓練領袖能力和分工能力。」紮好木筏唔代表完成任務，仲要搵4個人坐上去，最快扒到目的地再拖回岸上先至贏。「為顧及參加者安全，扒木筏者必須穿上救生衣，而且扒木筏路線係沿住海岸打橫扒，咁就唔怕愈扒愈出。」
其他活動
除了Team Building，浪高長岸還有租賃滑浪風帆、滑浪板、獨木舟等玩意，仲有教練從旁指導。另提供畀小朋友玩的免費設施，例如吊床、彈床等，就算唔係學生哥，扶老攜幼嚟到都大把嘢玩。
大嶼山體驗野營屋
去到大嶼山咁遠，想喺度過夜都有計，浪高長岸提供住宿配套，既有一般獨立房間，亦有私人營地供紮營。最有特色莫過於南非野營屋，內裏有榻榻米、雙人床、冷氣設備等，畀大家體驗野外樂趣。
Info
地址：香港大嶼山長沙下村29號
查詢電話：8104 6222
網址：www.longcoast.hk
沙灘團隊活動
收費：$200/人（需12人或以上）
時間：90分鐘（分兩節，每45分鐘一節）
南非野營屋
代用券收費：$230/張（平日）、$280/張（假日）（購買6張或以上便提供1個野營屋）
撰文：黎子豪
攝影：陳富權
模特兒：Mena