X-M1復古小龍女

復古設計一向是相機界的長青樹，當中玩得較出色要數Fujifilm。廠方近日為無反（Mirrorless）系列再添一員，以Classic造型的X-M1進軍入門市場，仲大幅收身將重量降至280g，啱晒各位小龍女使用。最吸引是首次於無反系列加入Flip芒和Wi-Fi功能，以後影完相便可即刻過落智能裝置，分享靚相話咁易。

售價：待定
今次X-M1有3種機身顏色畀各位揀，包括銀啡、銀黑和純黑。

Flip芒小機身

擁有銀啡、純黑和銀黑3色機身的X-M1，沿用充滿菲林味的Classic設計，Size明顯比同廠X-E1細成個碼，女仔揸上手啱啱好，惟跟機套裝鏡是Fujinon XC 16~50mm鏡頭，若然是配支XF 27mm F2.8餅鏡，袋落手袋都冇問題。縱然機身小巧便攜，但代價是移除了觀景器，取景要倚賴機背3吋芒，幸好屏幕能夠上下翻動90度及85度，高抄低抄都難唔倒佢。而機身按鍵亦經過重新編排，整體操作傾向DC，設有模式轉盤和兩個操作轉盤，以便單手調校設定。

減省低通濾鏡

雖說定位入門，但成像沒有因此而下降，皆因新機沿用APS-C尺寸的1,630萬像素X-Trans CMOS，並減省低通濾鏡（Low Pass Filter）以提升畫質；而且新機內置新一代EXR Processor II影像處理器，支援每秒5.6張連拍。話明係入門級，當然備有適合新手的進階自動場景識別模式，相機會因應環境自動調校設定，另可套用5種軟片模擬和8款濾鏡特效，想玩菲林效果都掂。

智能裝置預先安裝《FUJIFILM Camera Application》，即可收到X-M1傳送的影像。

智能裝置預先安裝《FUJIFILM Camera Application》，即可收到X-M1傳送的影像。

改用垂直轉盤設計，方便以拇指調校選項。

新增「Wi-Fi/Fn」快捷鍵，一按即可進入無線功能介面。

新增Wi-Fi功能

好多人影相志在Share畀人睇，故新機順應潮流加入Wi-Fi功能。用家只需在睇相時一按Wi-Fi快捷鍵，即可進入無線功能介面，配合安裝了《FUJIFILM Camera Application》的智能裝置，不但能批量傳送相片，仲可加入GPS資訊。惟張張相都Full Size過落手機，難免會好食位，所以用家於無線傳相時可選擇300萬像素細Size，仲可縮短Send相時間。可惜它不支援遙距拍攝功能，只能夠傳送相片至智能裝置，有點美中不足。