洛杉磯E3直擊搶試PS4獨佔大作

幾十部PS4晒冷

PS4改用全新外形設計，有網友話平行四邊形幾過癮，亦有玩家話似將兩部薄PS2黐埋，不過點都好，現場無論在展示櫃或試玩台，PS4都被密封在玻璃箱之內，想摸吓都唔得。Sony喺公開試玩區特別設置32部PS4主機，連埋大型遊戲區總計有幾十部PS4咁多，規模龐大。小記即場試玩咗多款獨佔大作，當中最討好要算是《Knack》，玩家要控制機械人打低眾多敵人，途中可取得道具令身體變大，亦可分身通過紅外線監察器，感覺有點似《古惑狼》加《塊魂》。至於王牌射擊遊戲《Killzone: Shadow Fall》雖然玩法與上集分別不大，但畫面表現得到提升，尤其是場景細緻度值得一讚。

《GT6》場內玩到場外

隨PS4推出的DualShock 4無線手掣，雖然體積變大，但拎上手都唔算重，手感不俗，只是現場仲未有Game試到中間觸控板，以及兩旁Share掣跟Option掣有乜用途。廠方表示新機會於今年年底推出，但幾時登陸香港則未有定案。除了PS4遊戲矚目，不能不提將於PS3登場的《GT6》，場內擺放咗10個駕駛座，場外更搭起試玩台讓玩家體驗真實賽車感覺，都幾大手筆，不過有番咁上下機齡嘅粉絲可能會問：「《GT6》真係能如期在9月推出嗎？」

PS4的北美、歐洲及英國定價分別為399美元、399歐元及349英鎊。	放大圖片	會場設有10台駕駛座畀各位試玩《GT6》，但只能在專屬賽道上試車。

同場加映

任天堂靠Mario出擊

Nintendo今年明知對手出新機，所以難免會較為低調，但現場仍有得試玩不少Wii U遊戲，當中焦點落在2014年春天推出的《Mario Kart 8》，以及今年底推出的《Super Mario 3D World》。前者玩法跟上集大同小異，重點在於加入反重力賽道，可垂直於牆壁行走，小記試玩雙打時，以GamePad當虛擬軚盤，機身小屏幕可顯示出地圖及排名資料。至於《Super Mario 3D World》支援4人合力冒險，每個角色都有唔同能力。隨住這兩套王牌Mario遊戲，加上將於今年內推出的《Wii Party U》、《Wii Fit U》、《The Wonderful 101》等，Wii U有望翻身！

新DualShock 4無線手掣會在頂部發出不同色彩，跟PS Move設計相似。	在展覽館場外設置《GT6》駕駛座供試玩，仲有真車作宣傳。	《Knack》要控制能吸食黃色晶體的機械人，穿梭不同場景作戰，儲滿黃色能量便可使出必殺技。

新薄版Xbox 360上市

Xbox One年底先推出，Xbox 360似乎仲有一段時間玩，所以Microsoft趁E3推出新薄版Xbox 360冧用家。其中4GB版及4GB連Kinect版分別作價199.99美元及299.99美元，價錢咁平都可考慮入手。就算已有Xbox主機都唔緊要，Xbox LIVE金會員由7月1日起到12月底，可免費下載兩款Xbox 360遊戲。至於公布咗近3年嘅Xbox LIVE Arcade日系遊戲《Crimson Dragon》亦正式於E3公開試玩，以體感方式操控飛龍作戰。

《Killzone: Shadow Fall》畫面表現細緻，動態背景充分發揮PS4機能。	任天堂主打Wii U版《Mario Kart 8》，賽道加入反重力設計。	見到《Super Mario 3D World》咁靚嘅水管影相位，又點可以唔拍照留念呢？
Xbox LIVE Arcade遊戲《Crimson Dragon》，現場反應唔錯。	美國有不少靚女Cosplayer呢！	《Tearaway》主角亦有來撐場。

特派記者：布偉倫