Ep5無線過相一嘟駁Like

Olympus為PEN系列再添一員，剛於日本發布新一代無反（Mirrorless）機王E-P5，小記當然第一時間試玩，仲帶住佢由朝拍到晚。新機在規格上不但拍得住旗艦級OM-D，引進強化版五軸防震系統，還首次為無反加入Wi-Fi無線技術和QR Code嘟機功能，明顯係順應即拍即Share熱潮。

售價：$8,990（淨機）$11,990（連17mm F1.8鏡頭及VF-4電子觀景器）（6月下旬推出）

嘟QR Code連線

去外地影相，影得靚唔靚還是次要，最緊要係Share得快博人Like。E-P5順應潮流引入Wi-Fi功能，只要於智能裝置預先下載《OI.Share》App，即可遙距操控相機，甚至後製相片立即分享。以往的Wi-Fi相機連線時總要Set一大輪，新機快人一步植入QR Code功能，用家以手機或平板嘟一嘟相機即可連線接駁，夠晒方便。很多人外遊時都唔願帶腳架，惟有硬谷ISO令到張相起渣，好彩E-P5配備進階五軸防震系統，能全方位修正抖動問題，仲新增IS AUTO模式偵測相機移動方向，例如橫移「Pan鏡」時，系統會修正上下震動，就算唔帶腳架夜遊新宿抓拍都一樣影到靚相。

一體化機身設計

新機不但秉承Olympus PEN F的經典外觀，機身更採用無縫設計，用家在頂部不會見到任何螺絲位，全部藏於底部，加上金屬外殼和撥桿開關，拎上手勁有質感，小記喺日本帶出街抓拍，隨即惹來不少途人目光。此外，背面的3吋Flip芒能夠上下翻揭取景，適合以高低角度拍攝風景，屏幕無隙式設計更貼近機身，貫徹一體化理念。另一特別之處是機身設有2×2操作轉盤，利用Fn撥桿的「1」和「2」選項，令前後兩個轉盤共支援4種功能，當撥去「1」時可用來調校光圈、快門或曝光補償，撥去「2」時則可設定感光度和白平衡，令操作更流暢。

3吋Flip芒用上無隙式設計，收納時將不會凸起。

機頂轉盤加入Photo Story模式，讓用家併貼靚相。

透過機背Fn撥桿，能夠讓前後轉盤支援4種功能。

新增間隔拍攝

日本咁多靚景，想搵個靚地方睇日出日落絕對唔難，如各位有恒心玩間隔拍攝的話，不妨使用E-P5新增的定時相片及影片拍攝功能，出來的效果猶如瞬間睇住鹹蛋黃升降。用家還可選擇時間間距（1秒至24小時）及拍攝張數（1至99張）；而定時影片仲可將相片濃縮為一段10短片，想玩到好似Discovery Channel嘅紀錄片話咁易。規格方面，新機具有1,610萬像素感光元件及TruePic VI影像處理器，令連拍速度可達每秒9張，加上快門速度擁有無反機款中最高的1/8,000秒，捕捉高速移動的主體手到拿來；而感光度更可由ISO Low（即ISO 100）起跳，就算幾猛太陽都可開盡光圈營造淺景深效果。