喪淋Tablet無懼風雨

Tablet Z 輕薄靚畫

外形跟足同廠Xperia Z手機嘅Tablet Z，10.1吋屏幕與圍邊加入強化玻璃，背殼則換成黑色防滑物料，厚度僅6.9mm比不少手機還要薄，拎上手觸感甚佳。睇番廠方資料，新機主打靚芒，植入Reality Display屏幕和Mobile BRAVIA Engine 2技術，睇片亮麗之餘，仲有四核心處理器同2GB RAM，規格簡直一絕！

SPEC.

處理器：Qualcomm Snapdragon APQ8064 1.5GHz四核心

屏幕：10.1吋（1,920×1,200解像度）

鏡頭：（前置）220萬像素、（後置）810萬像素

記憶體：2GB RAM、32GB內存、支援microSDXC

對外連接：藍芽4.0、microUSB、Wi-Fi、3G、LTE

作業系統：Android 4.1

體積：266×172×6.9mm

重量：495g

Toughpad 軍用硬淨

主攻三防嘅Toughpad，測試嘅10.1吋型號為FZ-A1，外殼採用堅硬嘅鎂合金，圍邊包上橡膠物料，甩手跌落地都唔怕整傷部機，加上符合MIL-STD-810G美國軍用標準，防塵、防水又耐壓，機Gor喺屋企唔覺意一腳踩落個芒面都唔爆，真係好似我咁Tough！效能方面只係中規中矩，選用1.2GHz雙核心處理器及1GB RAM，但商用嚟講夠用有凸。

Toughpad FZ-A1 售價：$15,800（b）	Tablet Z的插口設有保護蓋，機身厚度只有6.9mm，拎上手薄過唔少手機。	機背備有810萬像素鏡頭，支援「智慧場景辨識」及「無限連拍」等拍攝模式。

SPEC.

處理器：Marvell PXA2128 1.2GHz雙核心

屏幕：10.1吋（1,024×768解像度）

鏡頭：（前置）200萬像素、（後置）500萬像素

記憶體：1GB RAM、16GB內存、支援microSDHC

對外連接：藍芽2.1、microUSB、HSPA+、Wi-Fi、HDMI

作業系統：Android 4.0

體積：266.3×212×17.5mm

重量：993g

解讀IP防水標準

喺防水機成日見到IP跟住一串數字，好多人都唔知佢代表乜，其實佢係Ingress Protection Rating，屬國際防塵、防水及抗外物的標準。

Toughpad加入橡膠包邊，所有插口均加入保護蓋，感覺硬淨。	500萬像素鏡頭加入補光燈，由於微微向內凹，跌落地都唔怕刮花。	Tablet Z經得起水柱射擊，但淋得唔跌得呢。

當中IP後第1個數字代表防塵及防禦外物進入嘅能力，第2個數字代表防止液體滲透嘅能力，如Toughpad支援IP65嘅「6」代表隔絕灰塵進入，而「5」表示機身能承受水柱噴射。

有啲機款若符合單一標準，另一數字便以X代替，比方說IPX7的「7」表示產品具相關浸水防護功能，而「X」即唔提供防塵有幾勁。

開着Toughpad喪淋都絲毫無損，仲可抵禦120cm墜地撞擊。	Tablet Z手寫觸控相當靈敏，寫字畫圖都掂。	Toughpad附有觸控筆，用來簽文件更就手。

第1回合：黃雨跣手定啲嚟

普通喺機面濺水未必試到防水Tablet功能，反而喺邊位喪淋水至夠陰濕。當中Tablet Z備有IPX5/7標準，經得起水柱射擊和浸落1米水深30分鐘；至於Toughpad符合IP65標準防灰塵兼防射水。兩機同樣喪淋咗幾分鐘依然滴水不入，就算黃雨帶出街都唔使怕！不過落雨時跣手將部機跌落地就大鑊啦，所以防撞一樣重要。呢方面Toughpad要讚一下，四邊加入橡膠保護，可承受120cm墜地撞擊；反觀Tablet Z只得強化玻璃屏幕，就算跌落地好彩唔爆芒，部機都肯定刮花晒啦！

第2回合：篤得好 寫得Pro

話明係Tablet，上網、睇片、玩Apps全部要靠篤芒，當然要試一下佢嘅篤芒實用性，機Gor喺兩部機分別潦咗段字，發覺反應相當靈敏；Toughpad仲跟埋支觸控筆，雖然對小弟嚟講用途不大，但喺畀OL白領帶出街簽文件，感覺即時Pro晒！至於操控介面，Toughpad採用公版設計，但加入自家Apps如《Dashboard》作系統管理；而Tablet Z嘅UI靚啲，主打娛樂多媒體功能，都有Gimmick喎。

第3回合：追MV睇真啲

機Gor近期追韓星，經常上YouTube睇K-Pop MV，今次試播T-ara嘅《Yayaya》全高清短片嚟測試兩機聲畫表現，一聽就知Tablet Z贏幾條街，事關佢喺機身加入4個喇叭，配合S-Force Front Surround 3D模擬環繞聲，比Toughpad個喇叭仔勁好多。畫質方面，Tablet Z嘅Full HD屏幕色彩鮮艷，MV入面嘅歌手連髮絲都清晰可見，可以追實我最愛嘅昭妍BB；反觀Toughpad嘅屏幕只有1,024×768解像度，講畫質似乎連尾燈都見唔到喎。

達人教路

三禾電氣揸Fit人Simon ：「防水平板男士最愛！」

「我哋成日講嘅『生活防水』機種，實際唔係畀人帶去游水和潛水，而且一般男仔手汗大或遇着落雨，篤芒時難免被水分影響靈敏度，防水平板便可解決以上問題。不過奉勸大家唔好盡信產品嘅防水程度，將部機掉落水分分鐘鑄成大錯。」

機Gor Report：Outdoor穩膽

老實講Toughpad真係愈玩愈安心，點濕點跌都難佢唔倒，不愧為三防機種，專業人士或至Man猛男可以諗諗。但係普羅大眾唔會成日上山下海，又冇需要咁強嘅防護標準；機Gor就較冧Tablet Z，落雨防水夠晒用，加上靚芒又好聲，價錢仲$5,000有找，比起萬幾元嘅Toughpad抵玩得多。

Profile：機Gor

機不離身，不信Spec只信測試，不扮高深，懶理低俗，貪新不忘舊。

撰文：機Gor

查詢電話：（a）2374 0618、（b）2313 0666