IT冧女四式 智Sweet情人節

第一式：浪漫短片 NFC即睇

情人節同女神約會，男方禮貌上都應該去接人，想女方更冧的話，不妨事先整段短片。自編自導嘅短片固然有心思，不過起碼嘥你幾日籌備；今次小記推介《Tom Loves Angela》呢隻App，佢係搞笑變聲App《Talking Tom Cat》嘅情人節版，預載一套阿Tom求愛卡通，大家可以將平時唔敢講嘅嘢錄低，再透過貓仔變聲講出嚟，又可控制阿Tom在卡通中送花、送禮物，最後將短片儲存下來就搞掂。如雙方部手機都支援NFC的話，見面時更可機背貼機背，將段愛心短片Send過去，睇完仲唔甜到漏？

第二式：特效合照 愛意爆燈

情人節拖手仔行街，梗係要影幅甜蜜合照啦！雙人自拍當然難你唔倒，想再有特色啲就要靠《P.F. Love》呢類Apps。它內置多款情人節相框及圖案如熊仔、蛋糕、心心等，而且可以寫字兼畫畫，仲有Bling Bling特效添，效果似足貼紙相！搞掂後便可Upload上網，女神喺facebook睇到定必驚喜。其實網上仲有大量類似Apps，其中《Valentine's Love Cam》備有情人節專屬相框和公仔，只是風格成熟少少。

紙製玫瑰效果幾好，中間再套上預先準備的戒指，用來求婚都掂！	機背一拍再篤芒便可經NFC將短片傳給對方，睇完必冧！	《P.F. Love》備有多款合照相框，幾咁Fancy。售價：免費（iOS）

第三式：DIY玫瑰 心思滿分

玫瑰贈佳人可以話係情人節嘅傳統，可是情人節前後，鮮花例必貴到飛起。計小記話，與其拎住紮花行成日，倒不如親手整朵玫瑰畀對方更顯誠意！不少日系Printer品牌都提供打印內容，好似Canon Creative Park網頁便備有大量紙品教學，只要跟住指示用一般A4紙打印，慢慢剪貼便成。以紙玫瑰花為例，上至花蕊、下至枝幹全部有齊，製作過程唔使一個鐘，完成後可以連埋戒指等小禮物一併送畀女神。

情人節當然要影番張合照 ，攬腰兼面貼面自拍就最Sweet。

自製eCard可以遙距送到女神面前，惟受打印解像度所限，建議先加入特效和文字執靚張相。

第四式：隔空送卡 遙距打印

拍完拖、食完飯，送完女神返屋企，想再圓滿啲？咁就快啲拎部電話出嚟，將行街影嘅靚相加些悄悄情話，即刻變成心意卡送去對方屋企！其實Google有一個「Cloud Print」無線打印功能，只要將屋企部Printer設定作雲端打印，女神便可於Printer前收到心意卡，但當然事先你要搵機會喺佢部電腦做啲手腳啦！

Cloud Print點玩？

想玩「Cloud Print」其實好簡單，只要預先喺電腦利用Chrome瀏覽器上www.google.com/cloudprint/，登入Gmail帳戶並登記打印機型號。用家外出時便可以手機等流動裝置，將Gmail內的文件、相片等檔案，遙距傳至支援之打印機。

Step 1：先要喺Chrome瀏覽器登入Gmail帳戶進行簡單設定，啟用Cloud Print功能。

Step 2：跟住可於Gmail選擇列印，iPhone、Android手機都啱用。

Step 3：文件會以Print Job形式擺上雲端，選取相關Printer便可自動打印。

App變媒人玩配對

同女神行街睇戲，少不免會搵啲嘢玩，其實App界有不少關於愛情的小工具，如《Love-O-Matic》便可計算愛情指數，只要簡單輸入男女雙方名字就搞掂。當然，男士們最好事先計定數，若果太低分的話，不妨試吓轉用中文或英文姓名，結果會截然不同！如果計算出高分的話，仲可即時分享到facebook晒幸福添！

DIY情侶Tee加手機殼

若平日都想製作小禮物冧女神，各位大可發揮創意DIY Tee或手機殼，女方收到肯定甜蜜蜜！

自製創意Tee

各位只要有打印機及燙畫紙，再加兩件淨色Tee就搞掂。任你想印乜嘢相片和文字都得，用熨斗喺Tee上壓燙即成，快手之餘又有意思！

TR-301燙畫紙售價：$85

Instagram變機殼

進入www.casetagram.com網站，用家便可匯入Instagram、facebook等靚相，將之變成獨一無二嘅手機殼，效果特別。要留意網站雖然免運費，但視乎不同運送方法要3~20日才送到。

iPhone 5手機殼售價：39.95美元（折約港幣$311.6）

撰文：林子聰

攝影：方偉堅、林子聰

模特兒：Rain Lee、Daren Wong（Unique Model）