呢個年代，古惑仔都要進化，電影主角由伊健變謙謙，通風報訊由大哥大變Smartphone，連原本喺電腦玩嘅《古惑仔Online》都進化成手機和平板App《古惑仔3G》。新作玩法雖然離不開建立社團、鬥搶地盤，但好處係可以隨時隨地用智能裝置玩到，搭車等人時又得，瞓落張床度都得，唔使怕冇「腦」在旁而畀人搶走地盤！
新作可說食正《古惑仔：江湖新秩序》上映時間進行「封測」，同以往最唔同嘅地方係毋須喺電腦坐定定玩，變成iOS同Android版本，即係用iPhone、iPad、Android手機或平板都玩得到，可說係唔少遊戲嘅大方向。據開發商講，有計劃遲啲出埋網頁版，屆時便可以手機、平板、電腦大混戰。玩法方面則以模擬經營社團為主，由成立幫會，收o靚、買賣Items到搶地盤，全部要一手一腳搞掂，仲要擔心不時有其他玩家嚟踩場，少啲心機都玩唔嚟。
遊戲開始時要為新創立嘅社團改番個霸氣名字同Icon，建立後第一件事就要壯大社團規模，而玩家需要花10點氣力收一次o靚，至於所收嘅o靚係嘍囉或者猛人，就好睇大家嘅彩數！有人手之後，當然要去搶地盤，新作以香港街道為背景，仲有成條港鐵路線，可以由荃灣打到落尖沙咀同灣仔。另有個幾有趣嘅設計，就係打完交後，會跳到「21點」賭枱決定擸到幾多戰利品；如果玩21點玩得叻，仲會吸引到新o靚加盟添！
遊戲有好重嘅動作成分，搶地盤未必想像中咁易，因為隨時有幾十人在地盤把守，就算帶幾多兄弟去都隨時損手爛腳，所以應該好似玩RPG遊戲，帶多啲藥水去補血。每位手足都有一定嘅健康值，如果受傷得太嚴重，便需要「入廠」治理，當然醫藥費都係要找數嘅！搶地盤之外，仲可以去掃場或者賺外快，喺「劈友系統」入面，電腦會幫玩家搵來Level差唔多嘅對手，唔怕吓吓畀勁人屈機。
類型：經營、動作
開發：智傲網絡科技
平台：iOS、Android
售價：免費下載
網址：tb3g.gameone.com
撰文：布偉倫