美國CES直擊！LG OLED TV曲線革命

自2010年3D TV誕生之後，歷年美國國際消費電子產品展覽（CES）都畀電視玩晒，今年更有革命性電視技術OLED TV登場！雖然現場各大攤位都展出OLED TV，但真正可以喺2013年首季推出市場的只有LG做得到，呢部4mm激薄55吋55EM9700，畫質比現時電視何止高一班，仲有秘密武器「曲面」OLED TV現身，難怪參觀者都睇到唔願走啦！

具備55吋顯示畫面的OLED TV 55EM9700，最快於3月供貨！

4mm激薄層次感強

OLED TV係今年CES主角，但有能力生產出大尺寸OLED TV的廠商唔多，當中最快面世可說是3月供貨的LG 55EM9700。由於減省咗顯示板Layers，令機身厚度只有4mm，小記現場睇見以底座支撐的新機，有人在舞台行過時都會輕輕震幾下，薄得離譜！OLED TV另一強項係超靚畫質，可以做到絕對黑位，色彩層次感極強。而且廠方在RGB三原色上加入白色濾光片WRGB設計，令顯示亮度更高，完全將現時的電視比下去。

5度曲面立體逼真

據知韓國用戶已開始預訂到呢部55吋OLED TV，美國市場亦準備就緒，預訂價12,000美元（折約HK$93,600）。至於香港幾時有得賣？小記於展覽開幕時訪問LG OLED TV部門總監張文翼（Jang Moon Ik），佢話主要地區都會於今年下半年交貨，香港用家應該唔使等好耐。同場仲展出3部曲面設計嘅EA9800系列OLED TV，工作人員話這3部OLED TV以5度弧度向前彎曲，好處係能減低立體畫面失真，小記戴住3D眼鏡同傳統電視一拍，確實係曲面顯示立體畫面較實淨，立體感更集中，但暫時未有推出計劃。

5度曲面設計的EA9800 OLED TV排列在一起，立體感更強。

現場有得試玩首款支援Dual Play的《Mini Motor Racing》Smart TV遊戲。

現場有得試玩首款支援Dual Play的《Mini Motor Racing》Smart TV遊戲。

加推55吋及65吋4K電視

OLED TV之後，應該輪到4K電視發圍。今年差不多全部電視大廠都展出Ultra HD TV，不過大家應該記得，LG部84吋Ultra HD TV機王已在香港開賣，而廠方還順道公布埋較細嘅55吋及65吋Ultra HD TV，一樣內置2個15W重低音單元的2.2聲道音響系統，亦支援3D Depth Control同3D Sound Zooming技術，對用家來說可以較抵價錢去體驗4K畫質！新機亦會附有新款Magic Remote遙控器，方便控制Smart TV網絡功能，款式較上代更流線，手感更好。

LG在攤位入口，以122部3D電視砌成全球最大3D電視牆。

由於OLED TV加入WRGB設計，色彩鮮艷之外，畫面亦較光。

現場有好多參觀者，細味OLED TV的3D效果。

遙控器及軟件升級

新遙控器其實又點止得一款，另一款圓形頂部設計的Magic Remote，主要操控Cinema 3D TV，除了可用到點選及捲軸功能揀Smart TV程式，仲可配合語音辨識系統使用！另有一款為新Google TV而設計，正面似普通遙控器，背面係QWERTY鍵盤，方便輸入文字，而且內置收音咪功能，可以好似Siri咁用語音落指令，唔使每次都大大聲對住電視講「Hi TV」開機，現場工作人員話佢認到廣東話同普通話等42種語言添！

今年LG場內不斷有靚女撩人影相，影完立即以NFC技術傳至手提打印機，印相畀人留念。

今年LG場內不斷有靚女撩人影相，影完立即以NFC技術傳至手提打印機，印相畀人留念。

現場展出84吋Ultra HD TV 84LM9600，以4K畫質作賣點。

LG今年追加55吋及65吋這兩個尺寸較小的4K電視型號。

軟件方面亦變得更聰明，新增SmartShare分享功能，能將支援WiDi同Miracast技術的手機影片，以Mirror或Transfer形式無線傳到電視播放，做法有點似AirPlay；現場做埋示範無線連接手機，在電視大畫面以全高清及3D方式玩手機遊戲，小記親身試過效果勁正，只係必要性唔係咁大囉。

Ultra HD TV擁有800萬像素，顯示效果特別細膩，如片中男女掟嘢時，現場Feel到勁真實。	諗都諗唔到手機遊戲竟可以無線接上大電視，仲可升級至全高清同3D添！	新Google TV學埋Siri玩聲控，只要對住個新遙控器講嘢就認得到。
這款供高階電視使用的新Magic Remote，外形Cyber。	同樣是新遙控器，圓頭設計顯得更大方。