《人中之龍》之所以有咁多粉絲，除咗日本黑幫劇情吸引外，全靠作品含有大量小遊戲，令耐玩性大增。即將開售的《人中之龍5 夢、實踐者》更將之全面進化，加入「別傳戲劇」以Mini Games記述5位主角不同遭遇，讓玩家游走5大城市。當中女歌星澤村遙更首次擔正，配合爽快的打交絕技、無縫戰鬥風格等，定能使大家一玩上癮！
新作除了一眾舊角色「堂島之龍」桐生一馬、殺人犯冴島大河，以及收數佬秋山駿外，還追加新人物，包括風月雜誌作家品田辰雄和首次擔任女主角的歌星澤村遙。故事講述兩大黑幫組織東城會跟近江連合會之間的停戰協定，因近江連合會組長病歿而產生變化，兩大勢力和新組織均蠢蠢欲動，誘使各傳奇人物聚首抗敵。新作特別強化副本任務，增設「別傳戲劇」收錄小遊戲，如成為的士司機的桐生一馬，可以《Crazy Taxi》般飆車載客；歌星澤村遙則玩音樂節奏遊戲，需要撳掣跳Para Para等，玩法豐富！
至於向來備受好評的打交系統，新作採用無縫戰鬥表現手法，玩家在街頭找碴時可即時進入打交狀態，更保留「天啟」可於打交時領悟新招。此外，街邊嘍囉的AI也有所提升，如玩家使出絕招時，其他人識得閃開等，反應更人性化。當滿足特定條件，角色身上還會發光並可發動絕技，如擅長踢擊的秋山駿可使出「空中衝擊」連環腳、品田辰雄使出「流星衝撞」撞飛對手等，連澤村遙都有獨特「單挑」玩法，就是跟對手鬥跳街舞！
「酒店小姐」環節是《人中之龍》系列亮點之一，不過以往進入情節時都係齋睇字，投入度難免大打折扣，好在今集絕大多數酒店小姐都支援語音演出，真正做到聲畫兼備；還可以約佢哋出街玩，粉絲定必高興。此外，其他小遊戲都充滿地道風味，如名古屋養土雞進行賽跑的「跑雞盃經典賽」等，比起傳統玩花牌、打棒球等更得意，肯定唔會畀粉絲話冇新意。
類型：動作
開發：SEGA
平台：PS3
推出日期：12月6日
售價：$448
查詢電話：2366 1001
撰文：廖俊斌