YouTube總壇直擊五月天互動LIVE騷

平時睇演唱會，一係去現場睇Live，一係等演唱會DVD推出。從今以後，大家將會多一個新方式睇騷，說的是YouTube的Live Streaming Concert。小記今次直闖美國三藩市YouTube總部，見證台灣樂隊五月天舉行網絡演唱會，現場氣氛極High之餘，原來全球仲有逾50,000人串流睇直播；即時有過萬粉絲留言兼畀Like，隨時好Feel過喺紅館！

（左起）怪獸、瑪莎、冠佑、阿信、石頭

首隊華語代表

其實YouTube的Live Streaming Concert服務已推出了一段時間，當中不乏巨星演出如Justin Bieber、Jason Mraz等，全球反應熱烈，可惜全屬外國表演者。今次YouTube擺明想搶攻大中華市場，特意請來Google搜尋最熱門嘅華語樂隊、兼且成日用Google+分享消息嘅五月天，來到YouTube美國總部表演。雖然現場只有員工及家屬約200多人，規模似Party多過Concert，但小記在場所見，五月天同現場粉絲超互動，氣氛勁正；而且演唱會全程透過YouTube直播，據官方表示，高峰時段有超過50,000人觀看，名副其實眾樂樂！

專業現場隊伍

小記身處YouTube直播團隊旁邊，發現串流Live騷全程不但超流暢，而且影片質素更高達720p，安坐家中甚至喺手機上網便可齊齊Rock & Roll！五月天主音阿信還不時落台與觀眾互動，連在場Cameraman都要四圍走，目的就係為咗近距離捕捉畫面，需知道串流直播演唱冇Take Two兼冇剪接，難怪演出時全隊Crew都全神貫注，值得一讚！最正係演唱會直播之後，整個片段會擺喺YouTube上，錯過咗直播都可之後睇番。小記落筆之時，網上已有超過20萬人次觀看、逾13,000個Like及接近25,000個留言。

喺YouTube總部由2樓想落1樓，用滑梯就搞掂！

Google以五月天肖像製作咗Android公仔，印於Tee上相當搞笑。

網址：www.youtube.com/user/YouTubePresents

同場加映：Google+ Hangouts on Air與粉絲對話

演唱會後，五月天仲同7個地區嘅粉絲，包括香港、台灣、馬來西亞、新加坡等喺Google+ Hangouts on Air平台開視像Group Chat，最搞鬼係當日是結他手「怪獸」生日，粉絲齊齊唱生日歌之餘，仲用App即場喺畫面送咗個蛋糕圖像畀佢！今次活動嘅「總舵手」Google台灣市場部主管利啟正（Richard）表示：「希望透過今次五月天的直播和網上互動，令大家能更認識Google服務。」