4.1吋SH-01E女生專美

早幾日睇Tokyo Girls Collection，見到佐佐木希、土屋安娜等名模個個樣靚身材正，後來發覺日系女生唔止化妝有一手，連用手機都相當講究，個個都揀粉紅Bling Bling款式搶鏡。早前DoCoMo就喺當地推出以女生作主導嘅新機SH-01E，備有桃紅色閃亮機身、高像素鏡頭等賣點；機身闊度仲特別收窄，啱晒手仔細細嘅女生拎住玩！

DoCoMo SH-01E 售價：$4,680

電鍍背殼

粉紅色代表浪漫，桃紅色象徵溫馨，SH-01E正正將這兩種女性化顏色結合。除了機側兩邊以粉紅色點綴外，邊框及機背統一用上桃紅色調，背殼更加入漸變電鍍效果，Bling Bling感覺極濃！最重要是廠商刻意將4.1吋屏幕的邊框減幼，令機身闊度只有59mm；拍埋4吋芒的iPhone 5比較，新機明顯更的骰，女仔單手覆《WhatsApp》都好Easy！

攝影利器

每次打開facebook，不難發現好多女仔鍾意Snapshot，為滿足呢班攝影女生，新機內置1,210萬像素鏡頭，可以拍攝出最大3,000×4,000解像度相片，拎去晒A4大相都綽綽有餘！除了人像、風景、夜景模式，新機仲內置食物、文字、黑白等拍攝模式，加上HDR、防手震功能，影靚相再冇難度。當相片調至300萬像素或以下時，更可啟動連拍模式，影動感場面或者郁嚟郁去嘅寵物就最啱。

招牌靚芒

影相有保證，當然要配番個靚芒嚟睇相。新機沿用CG Silicon屏幕，據代工廠Sharp表示，新屏幕比上一代的透射率高約20%，而且耗電量更低。實測睇相、播片時，顏色不僅自然，亮度和對比度仲好充足！此外，屏幕引入咗Direct Tracking技術，下拉捲動頁面時，手指輕輕一掃，畫面即時有反應！規格方面，1.5GHz雙核心處理器及1GB RAM雖稱不上機王級數，但整體操作順暢，表現合格！

4.1吋大芒配上Sharp自家Feel UX介面，比傳統Android介面更易用。	跟機附送充電底座，橫放用來睇片都唔錯。	加送耳機延長線，直身插頭嘅耳機都唔使就住用。
支援IPX7防水標準，USB插口備有保護蓋。	機背大玩電鍍效果，漸變桃紅色勁搶眼。	拍埋iPhone 5（左）一比，可見新機（右）屏幕更大但Size更細。