年資淺嘅機迷，未聽過1994年嘅PC遊戲《UFO: Enemy Unknown》並唔出奇，但這隻打外星人嘅模擬遊戲可說是當年其中一隻經典，小記都唔知花咗幾多時間喺佢身上。等足18年，終於由Firaxis Games重新製作成《XCOM: Enemy Unknown》，將原有精髓加上新遊戲技術，既要控制小隊進入戰場同外星人激戰，又要平衡開發技術同各國利益，玩過一定會畀Like佢！
日本廠好興做Remake重製版遊戲，不過主要係將畫面高清化，甚少注入新意。今次呢隻《XCOM: Enemy Unknown》有啲唔同，由專出《Civilization》、《Pirates!》等系列嘅Firaxis Games開發，在原有遊戲架構上加入新構思，例如用Unreal Engine 3引擎打造同外星人鬥智鬥力的戰鬥場面。由於開發人員全部都打爆過元祖版《UFO: Enemy Unknown》，製作方面好有說服力。
遊戲主軸講外星人入侵，玩家需管理全球抵抗外星人嘅龐大組織，靠收取各國提供的資助，到入侵地點打外星人，還可檢獲外星人留下的東西來研發新武器，簡單啲嚟講其實同《黑超特警組》差唔多，不過有成隊兵畀玩家指揮。但遊戲玩法並唔係大家玩慣玩熟嘅第一身或第三身射擊，而係回歸原點玩回合制，即係類似戰棋遊戲入面，每個士兵都有移動點數，需要在有限移動點數內進攻。由於視線以外的未探索區域會以霧化顯示，增添遊戲的難度。
戰場上，每調動士兵一步都好講策略性，因為每個軍人就算有幾高經驗同軍階，被外星人打死後都不能復活。可能礙於現時玩家較追求遊戲快感，故新作每次出征最多只能帶6位軍人，比舊版吓吓十幾人出征少，但就可以將俘虜嘅外星人送上戰場打仗。在基地時，玩家亦有好多嘢需要考慮，例如同時間各地都有外星人入侵報告，便要從地點遠近、任務困難度同報酬等多方面決定出征地點，如果太偏幫某幾個國家，又會令其他國家不滿而減低資助額。雖然玩落都幾忙，但遊戲平衡度做得幾好，同現時「主流」靠畫面取勝的遊戲好唔同。
類型：策略模擬
開發：Firaxis Games
平台：Xbox 360、PS3、PC
推出日期：10月12日
售價：$388（Xbox 360）、$428（PS3）、$328（PC）
查詢電話：2528 0830
撰文：布偉倫