錢慧儀 傢俬狂熱
生活品味，每個人的取向不同，有人喜歡時裝、有人喜歡紅酒、有人追求名車，有人就愛享受美食。馬清揚太太錢慧儀（Winnie）最熱衷家居品味，更是傢俬迷中的狂熱分子，除了每年例必出席米蘭傢俬展參考國際傢俬情報外，她更有個心願，希望能開設一間與設計師合作的6星級型格酒店。
Winnie從事傢俬業多年，但她形容做傢俬賺不到大錢，不過，她仍然愈做愈起勁，原因她為的不是錢，而是為興趣。而且最難得的是，她的夫婿馬清揚同樣熱衷於此，每年米蘭舉行傢俬展，夫婦倆都會拍拖前往，實行寓工作於娛樂。
今年4月兩人又再到米蘭的傢俬展朝聖，這是他們自95年起，每年的指定節目，由於今年時間極短，所以只能夠在米蘭逗留兩天，不過這短短的兩天，她亦有不少見聞：「咁多年嚟留意到好幾個好正嘅設計師，最近就發現佢哋被其他公司聘用咗，我覺得自己等如時裝的buyer，幫公司買嘢都想將來賣得出。」
她說多年來都比較欣賞施華洛世奇的傢俬騷，每次都會有驚喜，設計夠膽量，而且入座的嘉賓必須by invitation，並非人人都可以入內朝聖，獲邀出席的嘉賓，自然是身份的象徵。她說米蘭傢俬展因搬離米蘭市區，所以交通不太方便，故她說若有朋友喜歡來走走，建議可到Super Studio，她說：「呢度之前係工廠區，比較多新設計師擺展覽，依家好多大牌子都擺，我覺得喺呢度可以搵到好多好好嘅設計師。」
只引入具潛質品牌
Winnie表示米蘭傢俬展是當地的一項盛事，平日米蘭街頭都靜悄悄的，但一到傢俬展，街上便會逼滿人來看展覽、參加展覽的派對等，好不熱鬧，當然出席派對最終的目的還是傾生意。不過是次Winnie並沒有引入新品牌，她說：「歐洲經濟差，唔係咁多人肯畀錢做新產品，新產品唔多，睇唔到好勁，唔想入住。」她做生意的原則，要做就要做好，不想予人錯覺她「唔得」，寧願是個品牌「唔得」，故她只會引入具潛質的品牌，她說現時幾乎每個月，都會收到十間以上的公司向她硬銷傢俬。她認為香港的傢俬市場其實不大：「香港有啲有錢人，屋很大，但通常鍾意classic嘅設計，行入去好似王宮嘅感覺；但鍾意買我呢啲傢俬嘅，買嚟唔係為咗晒命，係自己鍾意，有生活質素、有深度嘅先至會明白。」
腦子早有設計草圖
視工作為興趣的她，有兩個願望：第一，是希望可以引入品牌Antonio Citterio整個full line；第二，是希望開設一間6星級的設計師型格酒店。她說：「其實好耐之前已經想引入全部Antonio Citterio嘅設計，將所有佢設計，以及同其他牌子crossover嘅都融入我舖頭，依家已做到，（有冇一件佢嘅作品係你唔鍾意？）有，一張櫈，我會同佢講。」
至於開酒店方面，她說得興起。「希望同設計師合作，開設一間好有型嘅酒店，如果事成，會係好amusing。」那酒店會如何設計呢？原來她滿腦子已有草圖，大堂交由Philip Stein設計，房間就交由Antonio設計，最特別的是酒店頂樓會開設一間裝潢時尚的餐廳：「餐廳提供中餐和西餐，中西餐可以坐埋一齊，餐廳諗住搵三個人做，我想請Philip Stein、Marcel Wanders和Antonio做，相信佢哋從未試過走埋一齊合作。」
賺錢少少樂趣多多
以她識飲識食的品味，她希望開一間「舒服」、「享受」及「唔扮嘢」的餐廳，她解釋說外國有很多明星都愛幫襯這類型「唔扮嘢」的餐廳，這類型餐廳的客人，可以穿牛仔褲，chic look裝扮內進。她笑言自己的想法見報後，相信一定很快便有人跟風呢！不過她認為理想很難達到，因為大的地產商都志在搵錢，不會採納她的提議，小的地產商又未必能夠出到錢。
她說自己promote過很多牌子，就算「分手」亦是朋友，見面一樣開心，她認為做人做生意也應該如此，她的人生觀：「多個朋友好過多個生意，做傢俬唔係大生意，搵唔到好多錢，但最fun、最開心，有日有個project唔同我合作，我都唔會嬲。」
Winnie對設計有概念有興趣，但她不覺得自己是一位設計師，不過身邊的朋友總是愛聽她的意見，她說朋友都很接受她的意見，因為她不會收取費用呢！
最崇拜兩大師
Winnie心目中最崇拜兩位設計師，一位是Antonio Citterio，另一個則是Philip Stein。更形容兩人口味「愈來愈相似」，她說每次見Antonio，都是穿着一件淺灰色的T恤，細問下，原來他的衣櫃都是清一色的淺灰色無pattern T恤，她也發現到Philip Stein近年亦開始經常穿着一款拉鏈飛機師褸，她笑說：「有時我喺度諗，係咪要學佢哋，唔使煩襯衫，佢哋個腦就可以成日做嘢。」
出名模範夫婦
錢慧儀與夫婿馬清揚是社交界出名的模範夫婦，他們經常拍拖出席派對，錢慧儀又會陪伴夫婿到澳門賽車，而每年一度的米蘭傢俬展，他們更視為指定的遊點，Winnie笑稱老公更會充當會計師，每次為生意計數：「佢對傢俬好有研究，又鍾意藝術，所以年年都陪我去。」
採訪：Tracy Leung
攝影：黃叔榮
化妝：Sanah Leung @ Make Up For Ever
髮型：Michael Lo @ MAREK ART OF HAIR