馮德倫酒逢知己千杯戲

當年憑着帥氣的外形、深深的酒窩殺入娛樂圈的馮德倫（Stephen），令不少少女為之瘋狂。由歌手到演員，再轉型為導演，去年更與好友吳彥祖（Daniel）創立「突圍電影」，正式成為老闆兼行政總裁。從幕前轉戰到幕後，一生也圍繞着電影公轉，但卻從未覺累、從未感厭倦，大概這就是「熱誠」。

Stephen目標是於四十歲前成家立室。	馮德倫與好友吳彥祖去年合資開電影公司。	Stephen渴望創作出為影壇帶來衝擊的作品。

捱過「地獄」日子

人家常說「三歲定八十」，大概這句話說得沒錯。求學時期，每個年輕人都喜歡與三五知己打機、踢波、逛街，但Stephen卻有另類嗜好。「我屋企會放兩部錄影機，錄起鍾意嘅節目，然後自己剪接，剪剩自己覺得精彩嘅部分，嗰陣時覺得好好玩。」現在由興趣轉為事業，當然要面對更多困難，從挑劇本、選角、到拍攝統統一手包辦，即使遇上惡劣的天氣，仍要咬緊牙關繼續拍攝。「試過拍外景遇上大風雪，令到拍攝受阻。而且氣溫低到大家都好難工作，好辛苦。我哋靠一個識噴火嘅暖爐，我哋叫佢『地獄』嚟過日子。」

陳奕迅（右）、莫文蔚、吳彥祖與馮德倫鬥鬼馬。

自編自導自演的劇集《老馮日記》，是Stephen（右三）的得意傑作，更有一班好友力撐。

老馮一腳踢過足癮

即使吃了不少苦頭，但他對於拍攝仍然不亦樂乎，全因導演比演員有更高的控制權，可以從螢幕中展示自己的所思所想。「以前做演員，唔係話唔享受，不過為咗生活，就算明知係爛片都照接。但係依家係遇到好劇本先會做，係因為鍾意而做，安全感大好多。」

Stephen與人妻莫文蔚，再見亦是朋友。	Stephen曾經執導《跳出去》。	周星馳是Stephen導演生涯中的伯樂。

而入行以來，最令他感滿意的角色，就是在他自編自導自演的劇集《老馮日記》中演繹自己。「我做番自己，冇人可以做得好過我。雖然我哋有劇本，但係有好多對話都係即興、即場爆肚，而且請咗好多圈中嘅好朋友幫手，邊拍邊玩，所以真係拍得好開心。」而重看他執導的處女電影《大佬愛美麗》，請來當時的女友莫文蔚、好友陳奕迅、謝霆鋒等巨星演出，實在有天大的面子。能夠動員不同的藝人客串或演出，絕對是由演員躍身為導演的優勢。

構思衝擊影圈作品

平日忙得不可開交的Stephen，到底如何與朋友聯繫感情？他笑言美酒實在是功不可沒。而他最享受的時光，就是與友人一邊品嘗美酒、一邊閒聊的時刻。他大讚品酒既能聯誼，又能減壓，而且更不時會有意想不到的收穫！「其實好多嘢都係喺飲酒時傾出嚟，好似我同Daniel起初話搞公司，都係隨便傾吓，最後先真係下定案。而且飲嘢嘅時候，成日會講啲異想天開嘅話題，其實都有機會成為電影嘅題材！」而推動他不斷製作及構思新電影元素的原動力，就是他一直渴望製作出充滿活力，且合乎年輕人口味的作品，為影圈帶來更多衝擊。

40歲前結婚生仔

於2007年，莫文蔚（Karen）宣布與拍拖九年的Stephen分手，消息震驚整個娛樂圈。而去年Karen更與初戀男友拉埋天窗，組織美好家庭。對於舊相好踏入人生另一階段，Stephen坦言非常為對方感高興，並笑言他們再見亦是朋友，更不時相約吃飯。

問Stephen有沒有結婚的念頭？他坦言：「我希望自己可以喺40歲之前結婚生仔，雖然我依家仲係單身，不過呢啲冇得急，順其自然啦。」

視星爺伯樂 導出個未來

Stephen因電影《跳出去》而榮獲內地最佳新進導演獎，他坦言此電影的編劇周星馳（星爺），絕對是他導演生涯中的其中一位伯樂。「佢幫咗我好多，仲喺佢身上學咗好多嘢。最難得嘅係佢喺劇本嘅結構上處理得好好、好合邏輯，所以我可以放全部心機喺拍攝上。而且佢畀咗好大自由度我，其實喺拍攝期間，佢一次都冇嚟過現場，畀我自己發揮。」

至於坊間不時傳出他們不和的傳聞，他沒好氣地回應：「啲人成日都講佢煩、難合作，但係我哋兩個之間嘅相處真係完全冇問題。」

採訪：龔凱欣 攝影：黃叔榮