星期天，中環某商場，下午茶時段，朋友A打開報章，詳閱「咸太」的訪問故事和彩色圖片，她以資深時裝人的口脗說：「佢啲衫，真係好得，好有品味，我真係好鍾情佢。」
身邊的女性（及男性）朋友喜歡「大咸」，已經司空見慣。他腳法極精湛，為人又親切，樣貌勁俊朗，身材更正斗，還經常「慷慨解衣」脫剩內褲，引誘普羅大眾遐想，受歡迎是應得的。相反，他身邊的「咸太」天天一副晚娘口面，既像嬲了全村人，又像全村人得罪了她，樣子、身材、膚色亦帶點庸俗的人工修飾感，但憑着聰明的商業頭腦和精銳的Marketing團隊，居然給她捱出了Fashion Icon的國際銜頭。
朋友A淡然一笑，再說：「你唔鍾情佢都好，都會睇得出佢背後嘅時裝團隊有幾犀利，佢手上兩個品牌，都做得好靚。」
早陣子「咸太」來港宣傳，當然繼續其「全球最Cool」的形象，對傳媒不會報以笑容，對訪問亦老實不客氣。小道消息指出，記者英語稍為有差池，就給她的精英助理揪秤，預設的問題沒完全問完，也給她的左右門神「提示」繼續要發問。資深公關朋友B不以為然：「喂，佢哋係A-List人馬喎！唔通會對住你和藹可親、虛寒問暖？個個A-List都係臭四嚟啦！」
也許，智囊團都看出人類有「奴性」，巨星愈是架勢，就愈多人崇拜。但同是A-List，「減減」就Nice許多。