力挽回潮 血拼 袋凰寶座
潮界季季都話興復古，搞到設計師起勢回到五、六十年代攞靈感，令四四方方復古手挽袋回勇回「潮」。但是，一大堆款式如車輪轉般登場，的確令人花多眼亂。今日，一於想你所想，將姊妹們熱捧之時尚品牌手挽袋來個真正全面「血拼」，睇睇邊款可以力挽狂瀾實至名歸榮登新季袋凰寶座！
「后」選準則：（每項以五★為最高分）
1挽帶：挽帶最影響使用時的舒適度，以尺量度長短及觀察粗幼，兩者愈配合得分愈高。
2容量：用直徑6cm的彩波放入袋中，盛載愈多代表實際容量愈大。
3款式：檢視所運用的物料及設計的花巧程度。
4用法：除手挽外有沒有其他肩帶作側孭或背包用途，用法愈多得分愈高。
5價錢：綜合以上各測試，比較其價錢是否合理。
ANNA SUI啡紅色漆皮壓花手挽袋 $2,799（a）
1.挽帶：3.5★
長25cm的幼身手挽帶，手臂纖幼者勉強可以孭上膊。
2.容量：3★
袋身有一定厚度，放入8個彩波完全無難度。
3.款式：4★
袋身印有英文字壓花圖案，附送經典女人頭匙扣配飾，讚！
4.用法：5★
手挽、側孭及背囊用途任你揀。
5.價錢：2★
二千多元，未必夠親民，但勝在品牌人氣夠，粉絲必買！
總結： 17.5星！如自問是品牌粉絲又想湊復古風，買個嚟襯衫都值得！
Heather卡其色手挽袋 $459（b）
1.挽帶：2.5★
幼身手挽帶總長度22.5cm，中規中矩。
2.容量：1★
硬盒形設計，外形夠堅挺，可惜袋身較窄只能容納4個彩波。
3.款式：2★
袋身無特別設計，幸而橢圓形金屬扣加上窩釘點綴，型！
4.用法：3★
照顧大家所需加設側孭用法，等你多一種選擇。
5.價錢：4.5★
五百以下有交易，要買趁手！
總結： 13星！雖然實際容量不大，但價錢相當吸引，不妨考慮！
LOWRYS FARM白色手挽袋 $489（b）
1.挽帶：4.5★
手挽帶長29cm，配合適中的粗幼，舒適度極高。
2.容量：5★
可容納14個彩波，5個袋中容量最多的一個！
3.款式：2.5★
袋身正面有兩個帶扣，加上暗格拉鏈，方便取物。
4.用法：2.5★
除手挽外，仲可以當背包使用，不過背包肩帶固定，不能拆除。
5.價錢：4.5★
在物價高漲時代，價錢只是五百以下，抵！
總結： 19星！價錢夠平款式又OK，未能問鼎寶座關鍵在於白色仿皮料易污糟。
PAGEBOY淺粉紅×粉紅雙色手挽袋 $799（c）
1.挽帶：4★
手挽帶總長度28cm，配合交叉織法，手感十足。
2.容量：3★
四四方方的外形，可輕易放入8個彩波，挺實用。
3.款式：4★
以兩種色調的三角形組成，構圖如七巧板，配襯金屬袋扣，夠花巧。
4.用法：5★
可以一袋三用，想側孭或背包都得！
5.價錢：4★
賣相夠吸引又有齊側孭或背包用法，以價錢約八百來說尚算合理。
總結： 20星！日系出品，各方面均佔高分，實屬佳品，實至名歸成為今期袋凰！
PaPer minT淺啡色手挽袋 $829（c）
1.挽帶：2.5★
手挽帶粗幼度適中，加上21cm長度，拎起來尚算OK。
2.容量：2★
驟看盒形設計夠晒四方，但實際只可容納5個彩波，好睇但唔夠實用。
3.款式：3★
啡色盒形設計，線條簡約，配合呈L字形金屬扣，整體不錯。
4.用法：3★
隨袋附送一條肩帶，可以側孭使用。
5.價錢：3.5★
定價八百多元，尚可。
總結： 14星！帶復古味的盒形設計夠吸引，價錢亦可接受。
撰文：黃秀敏
攝影：胡振文
查詢電話：（a）2736 2371（b）2696 9222（c）2697 0510