顧家的女孩 Alice B.叛逆蛻變

所謂「人怕出名豬怕肥」，憑一輯打印機廣告在港走紅的Alice B.，成名後難免被人翻舊帳，找來一張張她與朋友狂歡夜蒲的相片，指她沉迷於夜蒲、溝仔，甚至濫藥！對此，率直的Alice從沒想過要隱瞞或掩飾，反而坦白承認自己曾有叛逆時光。「其實我以前真係曾經迷失過，我以前喺一間好差嘅學校讀書，嗰度成日都有暴力事件發生，啲人亦唔識得珍惜生命，會因好小事而自殺。我都識咗一大班壞朋友，成日走堂去飲酒，又去club夜蒲識男仔。」

目前單身的Alice直言已心有所屬。	每逢假期，Alice（左）定必返回倫敦探望家人。	人氣急升的Alice獲邀為各大時裝品牌行騷。

父逼離開損友

她灑脫地道出自己的墮落歲月，更坦言種種經歷令她更成熟、更圓滑，成就今天的自己。大家必定十分好奇，到底是甚麼原因令她痛改前非？她坦言一切居功於她的父親：「佢嗰時逼我離開英國，去泰國同哥哥一齊住，要我離開所有壞朋友，重新開始。我嗰時當然好憎佢咁強權，不過依家諗番轉頭，就知道佢其實係為我好。」雖然當年她萬般不願，每天只懂怨天尤人、躲在家中玩自閉，但「塞翁失馬，焉知非福」，她竟在這充滿痛苦回憶的地方，找到自己喜愛的職業——模特兒。「我哥哥喺泰國都係做模特兒，佢嘅經理人覺得我有潛質，所以喺我十七歲嗰年簽咗我做模特兒，而我喺泰國嘅發展一直都好順利。」

Josepe（右）	Alice分別與王友良及Josepe（上圖右）傳出緋聞。	工作態度專業的Alice，毫不介意性感上陣。

做過多份職業

Alice坦言自己曾做過許多不同職業，好像OL、保母、侍應等等，但統統都不適合自己。一直對時裝抱有濃厚興趣的她，投身模界看似理所當然，但背後的主因原來是「錢」。她坦言：「我屋企嘅經濟狀況唔係幾好，媽媽以前要做四、五份工嚟維持生計，佢朝早做託兒所，下晝做咖啡店，夜晚仲要喺酒店幫手，真係好辛苦！而爸爸係一個孤兒，佢成日同我講佢細個收過最好嘅聖誕禮物，只係一支鉛筆同記事簿！雖然家境唔好，但佢哋好盡心盡力咁照顧我哋三兄妹，將最好嘅畀晒我哋。」

Alice大讚葛民輝風趣幽默，大家合作相當愉快。

胸前的蝴蝶紋身成為Alice的標記。

減輕父親負擔

在港人氣急升，工作接踵而來的Alice，本應令家庭狀況輕鬆不少。可惜近年她的母親因神經系統出現問題，變得行動不便，失去工作能力，而她的姊姊亦不幸患上厭食症，可謂禍不單行。「佢哋兩個都病倒，冇辦法工作，而且仲要睇醫生！令到爸爸嘅經濟負擔更加重，我真係好心痛！雖然我好想留喺佢哋身邊照顧佢哋，但為咗令佢哋有更好嘅生活環境，我一定要出嚟做嘢！」逆境並沒有把Alice打垮，反而成為了她工作的原動力，希望盡快置業，讓家人有個安樂窩！

兩緋聞唔係真

家庭觀念如此重的Alice，會否因為過分投入工作，而錯失戀愛的良機？曾跟「日本通」王友良（Ivan）及富二代Josepe傳出緋聞的她，笑言跟以上兩位緋聞男友只是好友關係，但卻不諱言自己經常與不同男生約會。「其實我嚟咗香港咁耐，只係拍過兩次拖，對方亦唔係圈內人。我都試過同其他男模特兒約會，不過佢哋都唔係太啱我。佢哋太過滿足於自己嘅現狀，覺得行時裝騷係人生最大嘅成就，完全冇上進心。我需要一個可以教到我嘢嘅人，而唔係一個要我照顧嘅人。」至於目前的感情狀況？她巧妙地表示：「我依家喺facebook嘅relationship status仲係『single』。」

難忘首次被圍訪

憑與葛民輝合作的廣告而冒起的Alice，來港一年多，最難忘首次接受傳媒訪問的情景。「個廣告出咗之後，我完全冇諗過自己會突然間人氣急升。點知喺我跟住做嘅內衣騷，竟然有二十幾個傳媒嚟採訪我！第一個感覺係『Oh my God！』，第一次接受大家採訪，因為着內衣，我就已經幾近乎全裸咁企喺咁多人面前，真係覺得好尷尬！」

蝴蝶紋身的背後

Alice胸前的蝴蝶紋身，可謂她的標誌。她笑言是象徵着自己由毛蟲蛻變成蝴蝶的印記。「個紋身係我十六歲最反叛嘅時候紋嘅。一來自己好鍾意蝴蝶，二來泰國人覺得蝴蝶象徵幸運，三來係用嚟紀念自己以前瘋狂嘅日子。」她表示這是她身上的唯一紋身，而將來亦不打算增添其他紋身。除了怕影響模特兒工作，更因為這是她一生人中最特別的回憶。

採訪：龔凱欣

攝影：劉智源

髮型：Hazel（Marek Art of Hair）

服裝：Escada Sport