文昌位識揀 考試冇捧蛋
今日係年初四，好多朋友都要收拾心情上班，喺度祝願所有打工仔工作順利，步步高陞。喺玄學命理中，文昌星除可以幫助文職工作者事業發展外，小朋友讀書更係聰明伶俐，今日就搵嚟林惠江師傅講解吓如何增強文昌運勢。
文昌帝君
相傳「文昌帝君」為天上神仙，職責掌管莘莘學子嘅科舉考試，以及文職人員的職位升遷。從古至今，不少讀書人或從事文職朋友，都會拜祭文昌帝君，祈求考試順利或工作步步高陞。而在風水學研究上，善用文昌位能使人頭腦靈活，吸收力強，專注於學業及工作上，有助催旺自己的工作或學業運。
大利東方
以風水學中流年飛星計算，今年2012壬辰龍年嘅文昌位就喺正東方，所以讀書或工作嘅位置，如能夠貼近正東方，吸納文昌星福氣，令個人運勢加強，讀書、考試同埋工作自然會思路清晰、得心應手。
拜文昌行好運
今年係新高中學制第一年嘅文憑試，好多學生同家長都深感壓力重大，由於冇先例可援，大家都唔知道點考，所以好頭痕，網上不少家長已經打算喺今年農曆二月初三文昌寶誕，前往有供奉文昌帝君嘅廟宇為子女祈求考試順利。同樣如果今年有升學、讀書、進修、做計劃、升職等計劃嘅朋友，當日都可以前往祈福，以加強運勢。
祈福注意事項
農曆二月初三即係新曆2月24日，大家當日可以向當天或者去有供奉文昌帝君嘅廟宇進行拜祭。
香火最盛嘅當然係上環荷李活道嘅文武廟，但當日一定會人山人海。唔想太逼或者山長水遠咁去拜祭，大可以向當天拜祭，至於拜祭時嘅供品是葷是素悉隨尊便。在家裏拜祭嘅朋友，清香一炷亦可；如到廟宇嘅話，可買備香燭衣紙，供品隨意，由於人山人海，故不宜太多。但習例要買葱同芹菜，取其諧音，等小朋友可以「聰聰明明」同埋「勤勤力力」，但唔使多，每樣幾棵就夠。上香後將葱同芹菜，喺火爐上順時鐘轉三個圈，取其神力加持，帶回家後咪掛喺房，分幾天做餸進食就可以。此外，如果有買文昌風水擺設，例如毛筆或者文昌塔，寶誕當天亦可帶到現場，喺香火上轉三圈，以神力開光加持。另外要注意的是，當日千萬不要買風車返屋企轉運，因為文昌之氣屬木，風車以金紅兩色所製，木最忌金火，擺風車喺房只會損害文昌運。
戴啱「色」物利文昌
我們也可佩戴飾物來增文昌運，凡「文昌」風水物品，必須色澤鮮明，不能暗啞，選配掛飾時，也以此為先決條件，並可根據生肖所屬五行來選配顏色，配搭如下：
所屬生肖 適合顏色 所屬生肖 適合顏色
龍 粉藍 狗 粉紫
蛇、馬 粉紅 豬、鼠 粉藍
羊 粉綠 牛 粉黃
出生年份計算方位
除咗利用流年飛星計算每年「文昌位」之外，仲可以用出生年份，以八卦易數計算屬於自己嘅文昌位。方法如下，以自己出生年份最尾的數字對照，如：
尾數為2，（2012年，2002年，1992年，1982年……）的文昌位在「東北方」。
尾數為3，（2003年，1993年，1983年，1973年……）的文昌位在「正東方」。
尾數為4，（2004年，1994年，1984年，1974年……）的文昌位在「東南方」。
尾數為5，（2005年，1995年，1985年，1975年……）的文昌位在「正南方」。
尾數為6，（2006年，1996年，1986年，1976年……）的文昌位在「西南方」。
尾數為7，（2007年，1997年，1987年，1977年……）的文昌位在「正西方」。
尾數為8，（2008年，1998年，1988年，1978年……）的文昌位在「西南方」。
尾數為9，（2009年，1999年，1989年，1979年……）的文昌位在「正西方」。
尾數為0，（2010年，2000年，1990年，1980年……）的文昌位在「西北方」。
尾數為1，（2011年，2001年，1991年，1981年……）的文昌位在「正北方」。
註：如果屬於自己命格嘅文昌位同流年文昌位方向有所不同，大可跟從屬於自己命格嘅方位布置，總之其中一方配合到文昌位，都可以借到運勢，再加上自己的努力，自有事半功倍嘅效果。
善用文昌位助運
1. 最好將書枱或辦公枱，放喺文昌位置，自己背靠文昌方向，吸納旺氣。
2. 如果書房同書枱都唔可以郁動嘅話，咁就要用風水擺設嚟助旺自己嘅文昌運。
3. 最常見就係用四支毛筆，連筆架放置書枱或房間嘅文昌位置，借其吸納運氣。
4. 用四支富貴竹，用綠色花樽養住，放文昌位置，同樣可以吸納文昌運氣。
5. 亦有朋友用文昌塔擺放文昌位，除咗可以吸納文昌之氣，還可以防小人。
6. 喜歡玩水晶嘅朋友，亦可以用圓形粉晶球，放置文昌位增強智慧同埋防小人。
7. 由於文昌喺四綠位，所以配襯綠色衣飾可助旺文昌運，考試時會腦筋靈活。
8. 如果嫌綠色衣飾難配搭，可以在文具上選用綠色嘅筆盒或書包，一樣有用。
9. 由於文昌位五行屬木，所以忌配襯金色衣飾應考或面試，機會將會大打折扣。
壬辰年十二生肖文昌運
生肖屬龍： 「華蓋」星代表創作力，作文做計劃一定掂，但須防小人阻撓破壞。
生肖屬蛇： 「天喜」、「太陽」、「玉堂」拱照，代表喜事重重，考試冇難度。
生肖屬馬： 「天解」星代表逢凶化吉，但吉星乏力，做事會較多波折才可成功。
生肖屬羊： 「太陰」、「國印」兩顆貴人星助運，有利升職升學，平步青雲。
生肖屬猴：「三台」權貴之星幫助，智慧特強，但吉星乏力，需要努力才可成功。
生肖屬雞： 「地解」、「月德」扶持，但有凶星出現，對文昌運會較多阻礙。
生肖屬狗： 無吉星加上「犯太歲」，做事比較分心，凡事小心為宜。
生肖屬豬： 「紫微」、「龍德」、「祿勳」等吉星拱照，故做事可以得心應手。
生肖屬鼠： 「將星」加會，主有利考試運，但今年吉星欠力，故要多勞才多得。
生肖屬牛： 「八座」吉星利考試運，兼有「天德」吉星，主做事逢凶化吉。
生肖屬虎：因有「文昌」福星加臨，可想而知係十二生肖中，文昌運最強嘅一員。
生肖屬兔：「天乙」星代表得到貴人幫助，但今年犯太歲，故要盡心盡力才有成果。
林惠江師傅Profile
求學時期已開始研修中國玄學、術數。數十年來以「子平八字」、「玄空風水」、「文王卜卦」應各界人士邀請，在香港、中國內地、東南亞等地勘察風水，推算運程，以加強運勢。
撰文：余家洋、布永德
攝影：陳世昌
模特兒：Barbara、Beaky、Kathy、Gettys、Wawa、Charlotte、Koyuki@Talent 100
鳴謝：玄學家林惠江師傅