Spider-Man in Black Suit黑心做善事

新人操刀 有面見人

所謂「能力愈大，責任愈大」，由Hot Toys宣布開發Spider-Man系列開始，玩家就寄望甚殷，結果蜘蛛俠、綠魔仔都沒有令玩家失望。來到第三炮黑蜘蛛，驟眼看不過換上黑衫而已，但其實新意甚多，當中最大驚喜是奉送電影主角Peter Parker（杜比麥佳亞飾）頭雕，令蜘蛛俠玩具罕見地「有面見人」。頭雕由韓籍頭雕師K.A. Kim操刀，只修改過一次便獲電影公司通過，證明有一定神似度。惟試辦所見仍有不少瑕疵，例如鼻頭太寬、面形過長，而且表情木口木面，跟帶點邪氣的黑蜘蛛格格不入，若能一併修改的話相信會更Human-being。

兩層薄衣 唔怕露餡

作為Marvel經典英雄，蜘蛛俠Figure不計其數，但很多時都因要遷就緊身衣而難以活動。廠方過人之處是採用高彈性布料製作蜘蛛衫，薄身冇縫之餘，還兼具高度拉扯性；若細心留意，薄身衣更有兩層之多，內層遮蔽關節避免「露餡」，外層則用滴膠印上黑蜘蛛網，既反光又富有質感。然而玩家需留意，跟初代頭笠連上衣一併縫合的設計不同，為了方便換頭，今次兩者沒有車埋一齊，令組裝後頸背位置變得不夠貼身，但此舉能避免上代抬頭後爆線的問題，可謂有辣有唔辣！

背脊縫有立體蜘蛛Logo，並非求其印上去。	頭雕有改進空間，但依家連人面都有埋，相信戰損版不日會發表。	頭形做得幾似，眼罩更見複眼細紋。

沙人地台 捐錢換件

素體方面，雖然只是一般TrueType Body，但關節數量達30個之多，基本擒高擒低都唔怕「爆胎」。另外，玩得Spider-Man都預咗噴絲，以往好少Figure照顧得到，但廠方卻特別準備了5條蜘蛛絲，玩家只要逐條收入手腕，即可營造噴絲效果。跟盒配件係另一亮點，備有搪膠製的沙人上半身，大大件兼具質感，用來擺戰鬥甫士一流！另外，玩家落訂時只要多付$100，即可換購流星錘供沙人替換，其中收益將撥捐聯合國兒童基金會，齊齊做善心玩家。

巨型沙人氣勢磅礡，右邊流星錘則可捐錢換購。

附送5對可換手及標準橢圓形地台。

撰文︰陳志滔

攝影︰郭凱敏

查詢電話︰2388 4677