橋唔怕舊，最緊要受。所以，《反斗奇兵》又翻生了。
上星期香港海港城舉行「反斗聖誕總動員@海港城」聖誕布置亮燈儀式，好墟冚；今日輪到香港迪士尼，「反斗奇兵大本營」主題區正式揭幕，好多人；再加上某服裝品牌日夜力谷的Toy Story Collection，《反斗奇兵》好像全面大反撲，一下子征服全港。
世界真細小小小，香港迪士尼小得真奇妙，自成一國的「反斗奇兵大本營」當然不會太龐大，共有3項遊樂設施、一間小食亭、一些為攝影而設的模型道具，幸好全身綠色的「士兵」四處搞鬼，為現場帶來歡樂氣氛。最驚險的機動遊戲「沖天遙控車」，將乘客Fing前Fing後，離心力都幾巨大，嚇得大家尖叫又大笑。朋友問：「好似唔係好啱小朋友喎……」我答：「乜你覺得《反斗奇兵》係為小朋友而設咩？」
第一套《反斗奇兵》於1995年推出，當時只有5歲的觀眾，現在都21歲成人，何況不少人跟我一樣，已步入中年期（甚至更年期）。跟着胡迪和巴斯光年成長、建立感情的中坑中女，難得可以拋開現實煩惱，暫時重拾童真，也不在乎主題區的大小了。
回想起來，當年入戲院看《反斗奇兵》，正開始拍拖……電影紅足16年，情感卻維持不到3個月。
要與卡通主角合照的小朋友，去海港城都得，反正有棵布滿「三眼仔」的聖誕樹，真係好趣致。
旅遊飲食寫作人