《Assassin's Creed》系列成功殺出一條中世紀刺客血路，仲差不多每年都有新作推出。來到今日正式見街的《Assassin's Creed Revelations》，亦即係主角Ezio的三部曲終章，故事講佢追隨傳奇刺客Altair嘅步伐，尋找5條能解開刺客兄弟會未來的鎖匙，仲臨老學識玩炸藥和新武器鈎刃，果真學到老、殺到老！
上集「兄弟會」《Assassin's Creed Brotherhood》主角Ezio仍然眉清目秀，但到今集一拉近鏡頭，就見到他一臉于思，老態畢現，證明時間催人老。只是來到三部曲終章，Ezio真係有搏老命之感，竟然追隨住第一集傳奇刺客Altair腳步，由意大利轉戰至鄂圖曼帝國的君士坦丁堡同Masyaf，尋找5條關係到兄弟會未來的鎖匙，體驗Altair以往的生活和記憶，過程更驚險刺激，好似有一幕Ezio畀馬車拖行，一路上要避開碎石減低損傷，仲要爬上馬車同敵人玩「碰碰車」決戰，小記都要玩幾趟先可以過關。
雖然Ezio變老，但今集學到更多新技能，其一係學識整炸彈，除了能用來炸死目標外，還可分散敵方注意力。不過製造唔同炸彈，需要用特定外殼、火藥和材料，例如用炮彈碎片作為「餡料」的話，就可製造出碎片炸彈。另外亦可以製作出巨大聲響的小炸彈引開敵人，要用點樣嘅炸彈就要睇當時場合。主角今集還練成更強的鷹眼系統「Eagle Sense」，不但睇得見人和物件的微弱光芒，仲勁到可以追蹤目標移動路徑，要完成暗殺任務都易好多。
新技能外，當然唔少得新武器，今集就可以用鈎刃（Hookblade）。它的用途都幾多，最直接係刺殺敵人，另外可於跳躍時幫助主角攀到更高位置，甚至可以用鈎刃借力翻身逃走。鈎刃另一特殊用途係可以鈎住樓房間的滑索，滑行到特定位置，從天而降刺殺目標，好使好用。連線模式方面，今集開發小組加咗幾個新玩法，如FPS遊戲玩家好熟悉嘅Deathmatch，或者如搶旗仔的Artifact Assault等，加加埋埋有10種咁多，以動作遊戲嚟講確實少見。
類 型：動作
開 發：Ubisoft Montreal
平 台：Xbox 360、PS3
推出日期：已推出
售 價：$359（Xbox 360）、$388（PS3）
查詢電話：2418 8896
撰文：布偉倫