佐敦小店 鮮美活口蜆意粉

區內靚料西餐

要在渡船角這美食「圍城」突圍，最緊要夠新。海鮮西餐小店在旺區不是新鮮事，可是在渡船角算是難得一見。Raymond'z Kitchen就是區內少有的海鮮和歐陸餐廳。第一次去，你會覺得位置較僻靜隔涉，因它遠離食店雲集的文英街與文匯街，感覺較寧靜；環境樸實無華，卻不失舒適簡約，可以讓人飲兩杯，慢慢吃慢慢傾。亦因為位置問題，租金亦相對便宜，讓老闆兼大廚Raymond Zee可將成本放在食材上。意大利Rustichella d'abruzzo意粉、沖繩豬扒、美國Angus Prime牛扒、法國鴨腿等，用的統統是一級貨，連炮製甜品的朱古力Callebaut也從比利時直接入口，用料相當揼本。

即日街市海鮮

捨得用靚貨，因Raymond擁有多年做歐陸菜經驗。他曾於美國領事館和香港美國會所工作，年輕時亦當過海員，那些年的所見所聞，為他帶來許多創作靈感，更擅於將中西烹調法融合，所以餐牌上你會見到冰鎮蟶子、焗東星斑等新奇口味。要數招牌菜，一定是海鮮。歐洲生蠔、藍青口、新西蘭深水龍蝦仔，每天都有飛機貨返，夠新鮮；為滿足嘴刁食客，年過半百的Raymond更堅持每天踩單車走勻油尖旺區的街市買海鮮，鮮魚、白蜆、花竹蝦、象拔蚌，街市最靚的貨，都成為當天的特別推介。街市檔販見他親力親為，也願意留些靚貨給他，像活的法國麵包蟹，就不是每家餐廳都有。

蜆肉意粉 $148 意粉先用魚湯煮熟，再放蒜蓉炒，蒜香撲鼻，咬落亦帶魚鮮香，新鮮白蜆，每一口都有海水鮮味。

Shrimp Cocktail $138 選日本花竹蝦代替大蝦，肉質更爽口，吃時記得蘸由番茄、香草等調校的Cocktail Sauce，能帶起蝦鮮，十分開胃。

鮮魚湯煮意粉

請Raymond推介招牌中的招牌，他竟首推蜆肉意粉！吃過就知，意粉不是簡單淥熟淋汁或炒香，而用新鮮魚骨熬4小時製成魚湯再煮，加蒜蓉炒香，上桌時香噴噴，麵條飽吸魚湯鮮甜；蜆肉不是罐頭貨，而是街市即日鮮，肉身飽滿，每一口都帶海水鮮濃，不少客人都食過翻尋味。

甜品拼盤 $118 有Tiramisu、法式焦糖燉蛋、朱古力慕絲和士多啤梨奶凍，當中Tiramisu用意大利的Grappa代Rum炮製，甜度適中。	冰鎮蟶子王$168/2隻 蟶子以多種香草煲水烚熟再冰鎮，肉身飽滿，口感彈牙。簡單蘸辣椒豉油吃，不蓋其鮮甜味道。	燒南非鮑魚 $128 南非鮑魚先淋上燒汁及秘製醬汁再燒，入口可以嘗到鮑魚原味和燒汁的濃香，甘甘甜甜。

順帶一提，店子特別供應法國布根地小酒莊的紅、白酒，品質不俗；若自己帶酒來，只要預先向餐廳提供餐酒的資料，Raymond便可特別設計獨一無二的配酒餐單，實行以美食配美酒。餐廳負責人Rico說：「配酒餐單豐儉由人，最緊要是預早2星期預約！」

新西蘭深水龍蝦仔 $128 坊間少見，蝦肉較腍，但蝦味非常突出，以刺身方式演繹，最能品嘗到其鮮味。	法國麵包蟹每隻$500~$750不等 坊間吃到的大都是急凍麵包蟹，這裏卻是活的，蟹肉與蟹膏特別鮮甜甘香。	餐廳裝修簡單雅致，座位算闊落；設有包場服務。

撰文：蘇瑞霖　攝影：蘇榮基

查詢電話：2332 3009