2011年，美國英雄片大熱，Superhero風吹到嚟香港，各位潮男都紛紛熱捧，幻想自己都有日可以變超人；而電影公司亦食住個勢，於下年暑假檔期推出第一套將多個超人擺埋一齊嘅大製作《The Avengers》，場面之震撼確實令人期待。如果之前錯過咗，又煩惱緊咁多個超人唔知睇邊個先？今年眾多英雄電影首推《美國隊長：復仇者先鋒》，事關佢係第一個復仇者成員，創作至今都已經有70年咁耐，確實係元祖級！睇住隊長由弱不禁風變身成超人身形過程有血有淚，熱血程度爆燈！今次介紹嘅3D Blu-ray版本，最啱就係配埋屋企新買嗰部3D電視，個盾直頭好似會飛出嚟一樣！各位男士唔好以為Superhero電影一定會悶親女仔，事關美國隊長呢套電影唔係一味打打殺殺，仲勁多談情位，呢位Captain America真係浪漫到極！