Optimus 3D 孖Cam飛走眼鏡

近年3D電影、3D相機等盛行，但很多都要戴立體眼鏡先睇到效果，家中佩戴尚可，但若出街玩手機都要戴的話，隨時頭都暈！LG深明此理，於新手機Optimus 3D引入裸眼3D技術，毋須戴眼鏡都睇到立體介面、遊戲同短片；若用埋機背孖Cam，更可拍720p高清影片，拍靚女更加激凸，男士必Buy！

3D眼鏡可以丟埋一邊！（設計對白）
售價︰待定

激凸立體介面

Android手機鬥得火熱，為吸引用家自然要多花心思，早排先有日本水貨SH-12C手機玩裸眼3D，近日終於輪到LG發功。這部Optimus 3D驟眼睇外觀同一般大芒手機無甚分別，但只要撳一撳粒「3D」掣，立體旋轉Menu便會飛出來，提供3D遊戲及程式、3D圖片集、YouTube 3D等內容，相當豐富。機身更加入3D Plus影像優化技術，將殘影問題減到最低，小記用落發覺立體感比日系手機更突出，保證唔會睇到眼花！

Android 2.2介面提供7版首頁。	提供HDMI輸出介面，可惜跟機冇線送。	按一按機側3D掣，就可進入立體介面。
要拆蓋才換到記憶卡，不太方便。

實時修正3D

3D介面以外，新機還支援立體影相及720p高清拍片，皆因機背內建兩組500萬像素鏡頭，拍攝時只要按一下快門，系統便會把左右兩邊影像疊成3D效果，毋須再左右郁手機咁麻煩，仲可即時調校立體強度，相當易用！為了提升畫質，它還支援3D拍攝實時修正功能，自動改善濕度、溫度等環境因素對相片帶來的影響，配合3D防手震技術，每個人都可變成立體拍攝專家。

取景時可調校立體強度，實唔怕頭暈。

兩組500萬像素鏡頭相距2.4cm這黃金距離。

立體介面提供多個分頁，可看到3D動畫！

雙核心處理器

拍到靚片，但若Save得慢也是徒然，為此手機選用1GHz雙核心處理器，在雙記憶體輔助下，無論切換3D介面還是儲存影片，感覺都極之爽快！屏幕方面，4.3吋大芒本身已夠誇張，內裏更是IPS面板，可視角度比一般TFT高得多，即使打側睇都夠立體感。其他配套包括14.4Mbps HSDPA及HDMI介面等，還可透過DLNA技術，將內容輸出至LG Cinema立體電視，享受更廣闊視野。