釣魚 × Wakeboard 夏日有排玩
坐在岸邊釣魚好悶？租艇出海又怕好天曬落雨淋？咁就要試吓近年興起的魚排釣魚，既有海中心釣魚的感覺，又唔使成棚人先有得玩；而且可以玩埋Wakeboard，兼且有專業教練教路，一於跟住靚女模特兒 Hazel同Vanessa去西貢榕樹澳玩番轉！
大雨都唔怕
夏天雖然想同陽光玩遊戲，但實情係大雨都好想同我哋玩遊戲，出發當天滂沱大雨，一般水上活動的話，基本上都可以取消。而去魚排有度好，就係有瓦遮頭，見勢色唔對都可以匿埋避一避。就好似採訪當日，雖然要冒住大雨乘坐駁艇到魚排，但等一陣，雨已開始收細，之後仲出埋太陽，真係勁Surprise。
釣幾多拎幾多
停雨後當然第一時間出去釣魚！據負責人Patrick講，香港每個魚排都有唔同嘅規例，有啲畀一個入場費齋釣，唔可以拎走魚獲，有啲最多每人拎走2斤；但係今次採訪的「榕樹澳魚排」，可任你釣幾多拎幾多，睇吓你有幾本事。
負責人建議新手，可以先用手排釣魚，因為手感較好，較容易感覺到有魚上釣，通常可釣到泥鯭同火點之類；至於魚竿拋絲遠，但手感弱，不過有經驗的話能釣到鱲魚等大魚。魚餌方面，通常會用氣味較濃的南極蝦仔，入場費已經包小量蝦仔，釣友通常都會自己準備定各種魚餌及假餌。眼見魚排上有兩位哥哥已「搏命」咗10個鐘，戰利品都唔少，即刻問佢哋借條戰利品影張威水相先！
濕身玩Wakeboard
雖然坐在魚排可以望到靚景，但始終釣魚頗為靜態，係時候玩啲激烈嘅水上活動。負責人Patrick就推介Wakeboard，轉一轉船就有得玩！Patrick同佢拍檔都有專業牌照，各種高難度花式自然難唔倒佢哋，但對新手來說，要在水面企定定已經唔易，好在魚排會提供技術指導。「要注意Tension穩定，感覺要夠實淨，雙手要跟身體成T字形，以腰力帶動全身。」
安全至上玩得開心
Patrick話玩Wakeboard要以安全行先，「試過有位女客人玩高速水泡，玩到成件Bikini甩咗，要由朋友落海用毛巾抱佢上水。」如果怕蝕底，女生們可在Bikini外着多一件Tee以免春光乍洩。如果唔係太熟Wakeboard的話，可以早少少到魚排，有專人教授基本技巧及安全守則，最緊要玩得開心又放心！玩到攰仲可以返魚排釣魚、睇景及其他玩樂設施，玩足全日認真梳乎！
榕樹澳魚排交通
要到榕樹澳魚排，可在大學站乘搭807K號專線小巴，在井頭村下車後，步行約10分鐘便可到達榕樹澳。或者從西貢市中心乘新界的士往榕樹澳碼頭，車費約$40；至於從馬鞍山、烏溪沙轉乘新界的士，車費則約$60。到達後只需沿樓梯拾級而下，即可在小型碼頭等待駁艇，船程只需5分鐘左右。
Wakeboard名師出高徒
要練得高超Wakeboard技術，並非一朝一夕做得嚟，好在Patrick會開班授徒。「現時我哋有初級班，以4人為一組，星期一至五大概12:30pm開始，用兩個鐘時間在魚排講解起水動作、各種操控方法及安全守則，有埋Video睇，然後就係兩個鐘落水實習，以及一個鐘頭動作分析，玩到五點半左右。」
魚排釣魚選擇多
除今次所介紹位於榕樹澳的魚排外，在香港東部一帶，都有不少魚排畀大家玩成日，好似西貢三星灣、滘西灣、塔門及大埔三門仔等。要留意的是並唔係每一間魚排都提供水上活動，出發之前最好先打電話問清楚。
夏天最易釣烏頭
釣魚講季節性，夏天最易釣到泥鯭跟烏頭，用假餌或者蝦仔都可釣到；如果好運的話還可釣到鱲魚等。訪問期間，在場兩位釣魚高手就成功釣到金古魚，總算有收穫。
收費
釣魚
每位$100（冇時間限制，平日、假日同價，包駁艇來回及小量魚餌）
Wakeboard（Outboard快艇）
$500/小時（星期一至五）、$600/小時（星期六、日及假期）
Wakeboard（Inboard快艇）
$800/小時（星期一至五）、$850/小時（星期六、日及假期）
查詢電話：9226 1446
撰文：布偉倫
攝影：張群生
模特兒：Hazel Tong、Vanessa Wong（M.spy Model）