不少人旅行時喜歡手握旅遊書，貪佢有不同玩樂資訊，但打開本書得一堆字加幾幅圖，未必人人識得跟住玩。小記近來利用一些擴增實境（Augmented Reality，簡稱AR）iPhone Apps，以鏡頭向景物一掃，程式便能顯示立體旅遊資訊即時報料，睇到悶悶哋仲可以玩AR遊戲，感覺好新鮮！
撰文：李潤康
《DiscoverHongKong·AR》導遊香港
《DiscoverHongKong·AR》遊玩App由旅發局推出，應用了AR技術增加互動性。只要以iPhone鏡頭掃描四周環境，就能自動偵測附近景點資訊，當中包括了100個景點、5,000間商舖及2,000間食肆，相當足料。用家還可預早以Wi-Fi更新資訊，就算唔用3G上網都冇問題。
售價：免費
到台灣少不了大吃大喝，但台灣咁多好嘢食，未必人人識「搵食」。這App內建上萬個台灣美食資訊，並且融入AR技術，以iPhone鏡頭對住眼前景物，便會標示出美食目標，並提供電子指南針告知方向。用家另可依關鍵字搜尋餐廳或附近的美食資訊，更可用「美食日記」記錄下來。
售價：2.99美元（折約港幣$23.3）
《One Piece ARcarddass》
凌空開打
旅行搭車悶悶哋，不妨用AR實景玩遊戲！近日連日本暢銷漫畫《One Piece》都推出《One Piece ARcarddass》App，以鏡頭對準遊戲卡就會認出人物或道具，並可使用他們作「空中對戰」。雖然要用日本帳戶才可下載此App，而且遊戲卡要7月底才於日本發售，但App內已預載了路飛和卓洛兩個角色畀玩家對戰，漫畫迷相信已經忍不住單撈來試玩。
售價：免費
原來各位身邊隱藏很多AR怪物！利用《AR Monster》App便可看得見，仲可與牠們對戰。玩法很簡單，只需打開GPS功能，再用鏡頭周圍掃便見到AR怪物。遊戲有600種怪物，不同環境更會出現不同種類，好彩的話還能找到珍貴怪物挑戰。當與怪物戰鬥後便可記錄資訊，看看你能否集齊咁多種呢！
售價：免費
去台灣旅行唔想帶住厚厚的旅遊書出街，這款由中華黃頁推出的《hiPage 搜go!》肯定幫到手。它結合了AR技術，以鏡頭掃描景物即可認出附近的旅遊資訊，包含了全台灣逾萬個商家、企業、旅遊景點、無線上網熱點和買屋租屋等資料，而且係免費下載，資料多到嚇親人。
售價：免費