紅彗星PC色誘鍾舒漫

近期高達界的大事，莫過於新一輯《Gundam AGE》動畫登場，機體不但由小朋友駕駛，更大打外星敵人，惹來大批高達迷抨擊。但各位睇完以下推介，應該會開心番，皆因本地品牌Metalware日前推出5款以《Gundam》自護公國機體為概念的電腦主機，渣古、大魔等全部雲集，連歌手鍾舒漫（Sherman）都大讚5款新機各有不同特色，實用得來又搶眼，仲話要買部紅彗星返屋企！

紅彗星外號三倍速，上網會否快3倍呢？（設計對白）

獨眼加胸甲自護軍上身

高達歷年來與各類產品都有玩Crossover，只是大多以RX-78等主角機為主題，今次Metalware不但搶先推出高達電腦，更特別選用自護軍機體作主題，紅、綠、紫、灰、藍五色機身，分別代表紅彗星、綠渣古、大魔、自護號和魔蟹，機前面板及開機鍵更統一用上機械人的獨眼設計，開機後隻眼會亮起紅燈，神似度爆晒燈！另外，機殼更印上每款機體獨特標記，還有自護公國徽章以及機體的胸甲圖案，設計有心思，引死一班高達粉絲！

迷你盒仔擺放慳位

設計攞滿分，其實內涵都唔失禮。《Gundam》動畫中，機體擁有不同的機能及武器，原來5款主機的硬件規格亦各自不同，廠方會率先推出紅彗星、大魔、綠渣古3款，當中以馬莎駕駛的紅彗星規格最強，內置新一代Core i3處理器、4GB記憶體及750GB硬碟，睇片煲劇均可應付自如，更備有HDMI、DisplayPort等輸出介面，駁落電腦屏幕或高清大電視都掂，最啱用來重溫高達動畫！機身體積亦比一般機箱細了一個碼，配合背部的Wi-Fi天線，擺在客廳都唔怕阻地方。