消暑射水槍 南丫島動感浮遊

水上彈床跳走暑熱

彈床大家玩得多，但浮在海上的彈床又玩過未？驟眼睇水上彈床似足一個圓形小浮台，底部設有充氣位，只需充滿氣就能浮於海上，而彈床位則設於中央，既堅韌又有彈力，3個人一齊玩都冇問題。但別忘記彈床是浮在水上，所以玩者彈跳時無可避免會令彈床飄移，更加難平衡；不過好玩之處正在於此，一邊彈跳一邊推對方落水，又或者好似小記咁帶埋水槍騷擾對方，睇吓邊個先做落湯雞。

碰碰船的骰過癮

碰碰車大家玩得多，有冇興趣試一試碰碰船？其體積的骰，只供單人玩，船內兩邊設有把手，玩者能簡單控制前進、左右和倒後，小朋友都啱玩。

Rika與Cherry起初被大浪一拋即時跌低，但這正是好玩之處。

想感受大自然又不想濕身的話，碰碰船就最適合不過。

水上三輪車巨轆任踩

想在海中過二人世界，大可選擇玩水上三輪車。同女朋友踩到海中心，一齊跳落水游兩轉，既浪漫又過癮。

水上三輪車相當易玩，Cherry與MeiMei一坐上去就控制自如。	帶埋水槍玩的話，就可以玩埋水上追逐戰。	玩之前有教練作簡短指導，安全最重要。

巨墊水上飄海上奔走

巨墊可說是一張巨型浮床，它由聚丙烯海棉製成，可承受1,500磅重，十幾人走上去依然浮力十足，最好玩是將巨墊飄出海中心後，體驗「輕功水上飄」，在高速奔走時考驗各位平衡力，玩到倦，躺在巨墊上曬太陽亦有另一番樂趣。

三人獨木舟考合作性

擔心水上彈床及碰碰船太刺激的話，亦有適合一家人玩的三人獨木舟，玩之前有教練作簡短指導，就算完全未玩過獨木舟都可以立即上手。它講求3人合作性，否則好像Rika划向左時、Cherry與MeiMei就往往划向右，搞到架船不停打轉，真係需要好好訓練。

奔走時濺起陣陣水花，驟眼睇好似「輕功水上飄」。

三人獨木舟

水槍激戰暑氣全消

去得沙灘玩，水槍自然是必備玩具，沙灘追逐打水戰固然好玩，又或者好似上文提及，帶埋水槍去玩水上活動，隨時可以創出更多新玩法，就等小記推介幾款水槍給大家啦！

揀槍攻略

一般人揀水槍只考慮款式及價錢，其實儲水量及射程亦相當重要，如要玩碰碰船海上槍戰的話，就要揀支射程遠的款式；玩沙灘追逐戰的話，就要揀一支要儲水量夠多，避免射兩射又要去入水。

反斗車王 輕巧外形玩偷襲 以人氣動畫《反斗車王》為主題的水槍，紅色槍身夠晒搶眼，加上的骰輕巧外形，用來偷襲「敵人」最為適合。售價：$49.9（b）	Avenger三段威力 靈活性強 設有三個槍口，玩家可透過調節槍口而控制三段水力，可容納900ml水，可說是打持久戰的必備武器。售價：$99.9（b）	Pressurized Goblin增壓水槍 遠射最啱 雖然槍仔細細，重量不過570g，但卻能容納280ml水，透過增壓可將射程增至11米，遠射「敵人」令人防不勝防。售價：$99.9（b）

欣賞海景嘗美食

玩水上活動極消耗體力，想吃點東西休息一下，小記推介坐落模達灣沙灘旁的星浪餐廳，由小食、意粉到特飲一應俱全，最難得是環境開揚，品嘗美食時對正沙灘無敵大海景，偶有清涼海風吹送，還以為自己身處外國。

炸魷魚圈 外層香脆，炸粉不會太厚，令油膩感大減；魷魚夠彈牙，送啤酒一流。售價：$68（a）	凱撒沙律 生菜入口清爽，配以煙三文魚片，口感豐富。售價：$75（a）	雜果賓治及檸檬特飲 雜果賓治（右）果味濃郁，不會太甜；檸檬特飲（左）酸得夠醒胃，炎夏最啱。售價：$35/杯（a）

日本妹帶起浮遊熱潮

提起浮遊相片，不得不提日本女孩Natsumi Hayashi，就是她率先將浮遊相擺上Blog，由於影得又過癮又靚，引起極大回響。如果各位想睇她的新作，可到www.yowayowacamera.com。記得影浮遊相要注意以下幾點：大光圈、高速快門及連環快拍，咁跳得幾快都能捕捉定格一刻。

西沙水上活動中心資料

價錢：$118任玩2小時（會員價，必須預約，非會員價$135）

地址：南丫島模達灣7號

電話：2792 8307

交通：於香港仔碼頭乘搭前往模達灣的街渡，船程約23分鐘。

搭街渡要注意

想乘搭街渡去南丫島西沙水上活動中心，最好之前上網（www.ferry.com.hk）或致電（2982 8225）查詢模達灣的船期，因為雖說平日平均每60~90分鐘一班（星期日及公眾假期每45~60分鐘一班。），但送船尾的話隨時要等個幾鐘。

撰文：周仲明

攝影：方偉堅

模特兒：Rika（GME）、Cherry、MeiMei（In Management）

查詢電話：（a）2982 8186、（b）2991 6222