麥浚龍極端功能主義

麥浚龍向來有獨特的時裝觸覺，而且總是有「點石成金」的功力，令他自然而然的走在潮流的最前端。的確，時裝的敏銳是天生的，不過麥浚龍自言只是個「極端主義者」，對時裝是注重其功能性多於美觀。

麥浚龍（Juno）是個不折不扣的低調潮人，總是黑沉沉的衣飾，卻出奇地滲透着很「麥浚龍」式的風格，外間有傳他喜愛以Full Gear上陣，身上只容許單一的時裝品牌，他謂：「我覺得呢個係對品牌同設計師嘅一個尊重，都唔係必定要成Set着上身，只係咁樣比較好襯啲，當然都要睇番個人嘅比例，我覺得高有高嘅好睇，矮亦都有矮嘅靚！」假如有留意麥浚龍的打扮，你會發現他的飾物很少，亦從來不會自行在衣飾上「加鹽加醋」，他說：「我唔鍾意DIY，覺得件衫買番嚟係咁就係咁！」

麥浚龍的打扮，會隨着工作性質而改變：「我着衫有兩個路線，做歌手嗰個麥浚龍係大眾嘅；但係做演員嗰個麥浚龍就係冇限制！平日我出活動，當然可以揀自己喜歡嘅品牌，但係做演員嘅時候就完全睇個角色。」

放大圖片

性格古怪愛病態物

自言性格古怪的他，喜歡較病態的東西，從音樂到時裝都可以反映到：「我係鍾意啲剪裁好奇怪嘅嘢，最好『小眾』啲，我係刻意唔『大眾』嘅。好似以前我成日着Visvim，依家好多人都會着，但係我就會變得唔係咁鍾意，因為咁嘅原因，我只可以鍾意幾個牌子。依家好多品牌都賣『功能』，但係我搵到啲比佢實用，而且功能好多倍嘅，係真正嘅『功能服』，咁我點解仲要買嗰啲只係表面功能嘅嘢呢？」別以為麥浚龍身上的服飾都是天文數字，其實他喜愛的東西很平凡：「講真，我好鍾意着利工民，因為佢真係幾暖，我欣賞功能性多過外觀！」

喜歡的就要去到盡

麥浚龍強調他的執着只因個性極端，喜歡的東西就要「去到盡」：「好似之前我拍戲咁，因為好多危險場面，於是我就從電影嘅危險角度去諗。我記得有次我拍落水戲，工作人員用保鮮紙包晒我全身，不過都係會入水同埋凍，而且用保鮮紙始終唔係咁方便，我就諗如果有件保暖嘅潛水衣，我就落冰河都唔怕，於是我就不停上網搵，搵到自己心水嘅嘢，我仲會電郵個設計師，好想認識到佢！」這個就是為何麥浚龍總是走在潮流的最前端的原因，喜歡發掘，而且主動拉近距離。

女伴也潮

麥浚龍固然是潮人代表，連他身旁的女友亦是潮流分子，前緋聞女友鍾欣桐（阿嬌）亦是時裝狂熱，早前本地潮牌Ground-Zero剛推出，阿嬌已經率先着上身；另外，與他剛甩拖的女友戴庚玲更是模特兒，因為工作關係經常優先「試着」，每次打扮都是走在潮流最前線。

阿嬌以綴有印花圖案的Tube Dress配窩釘高踭鞋，極富流行元素。

戴庚玲是潮模，跟Juno可說十分匹配，可惜早前二人已告分手。

3M防煙口罩

實用世界末日功能篋

麥浚龍透露最近有個奇怪的念頭：「我成日都諗如果天空突然有個火球飛落嚟咁點算？所以我最近準備咗個世界末日用嘅篋，應付啲突發情況！」他立即如數家珍介紹嚴選的「應急」用品，當然是時尚而且功能性兼備的，而且還是從頭到腳都完全照顧到：「呢對Northern Outfitters雪靴可以抵得住-30℃嘅低溫，着起嚟好舒服，今季又興，加上我鍾意大大舊、有啲笨嘅款式，啱晒我！」

另外就是他在網上找來的軍用滅聲耳筒，大讚夠便宜又實用：「幾百蚊真係好平仲要好好用，佢可以隔晒啲噪音，不過人聲就依然收得好好，仲有埋個插頭同咪，方便軍人同同伴溝通，平日拍爆破場面都會戴住保護耳朵。」最後就是外形誇張的3M防煙口罩：「呢個口罩真係好好用，拍戲嗰陣都會用到，因為我拍動作戲有好多爆破場面，每日都身處喺濃煙之中，我自己氣管又唔係咁好，如果我冇咗佢，我諗會窒息死咗，哈哈！」