嚴選S/S 2011必備潮物 祖兒挑戰露趾鞋
時裝，一個你與我息息相關的話題，要裝潮就要貼潮，趁着開季的日子，本報找來行內人預告春夏潮流趨勢，以衣着屢獲好評的歌手容祖兒及時裝達人Janice Wong（王麗儀）的潮流敏銳觸覺，絕對是最佳人選。今次她們為大家教路，詳談2011春夏潮流大勢。
頒獎禮大贏家容祖兒（Joey），歌唱技巧毋庸置疑，不過講到fashion，Joey近年衣着備受讚賞。踏入2011，本報邀請Joey挑選心中2011春夏時裝的「must have item」。
Joey在舞台上是百變歌姬，其形象原來除了由形象顧問提供意見外，私底下她的參與度日益提高，對自己形象更顯得心應手。Joey坦言自己的時裝觸覺來自工作，她說：「可能我個性鍾意尋根問柢，平日工作接觸好多時裝界朋友，一味靠問加埋成日睇時裝書。好多身邊朋友都係時裝精，呢啲或者係物以類聚！」
成時裝周VIP
Joey近日與時裝界關係更加密切，在時裝界升格成為時裝周VIP，早前更獲超級品牌賞識，邀請到巴黎以VIP身份坐首行欣賞時裝騷。而此行對她而言獲益良多，她說：「我睇咗好多騷，更加清楚乜嘢係in同out。」Joey並為大家推介五款她心頭愛。
Platform露趾鞋
「我本身好怕露趾鞋，不過今年好流行露趾涼鞋或者係好高嘅，仲要係露趾個隻！我都會因此改變一吓作風，試吓着呢類型鞋露一露腳趾！」
花print sheer dress
「我自己就鍾意碎花sheer dress，好長嗰隻長裙！今年好多牌子都出長而薄身嘅裙為主，啱晒我！冇特定牌子，只要colorful就可以。」
太陽眼鏡
「太陽眼鏡對藝人好重要，之前幾季都以80年代為主，今季我都係想買比較誇張少少嘅款式，全為上台表演，lace亦係今年大熱item。」
Tote bag
「今季流行嘅手袋，大部分以簡約為理念，我唔會為咗牌子而去買，我只係鍾意個款夠簡約，而且實用兼大方。」
豹紋tote bag
「出街買嘢自備購物袋，輕身tote bag係好必要嘅，加上動物print喺今個春夏好流行，所以我想要一個豹紋袋！」
撰文：劉慰思、吳天慧
部分圖片提供：連卡佛、On Pedder