今日係年初四，假又放完，錢又使晒，聽日仲要返工添，但係個人依然冇乜工作Mood，點算好？呢個時候，最適宜搵啲iPad小遊戲玩吓，放鬆心情好讓自己更能夠投入工作再搏殺！筆者就揀咗以下呢個電單車Game，你呢？
呢個由Tuborilla AB開發嘅遊戲名為《Mad Skills Motocross》，玩家駕駛一輛越野電單車同電腦比賽，競速同時要克服賽道上重重障礙，難度不低，但又幾刺激好玩。控制方面，主要有4個虛擬按鍵，分別係油門、煞車、向上同向下，由於電單車飛過跳台時可能會失去平衡而翻車，所以要以上下方向鍵好好調整車身角度，加上電腦車手係完全唔留手嘅，所以要過關都唔係一件易事。
遊戲以2D畫面表現，好有懷舊味道；總共有52條賽道，除最初幾條入門級數較簡單，後面嗰啲都相當考技術，最後幾條更係神人級數，筆者經多番挑戰依然未能過關，仍在努力中……除上述操作之外，到後來閣下嘅戰車更會增加特殊功能，例如特殊起跳、噴射加速、後翻等，能力增強之餘，難度亦會升級，記住唔好得意忘形去亂用新功能呀！
檔案體積：19.7MB
支援機種：iPhone、iPod touch、iPad（需升級至iOS 3.1或以上）
售價：$0.99美元
撰文：郭賢宏