徐濠縈甜酸苦辣時裝路
徐濠縈（Hilary）人稱她阿徐，是別人眼中的潮人，你亦可以稱她為潮媽，在時裝界有今日如此地位，一切得來不易，她形容是以辛苦努力的血淚史搭建而成的，她為做全面時尚人，現在上網寫blog、微博、facebook來分享時裝資訊，樂於與同道中人交流打扮心得，及披露新季潮流。這一批人，經常也給人一種寓工作於娛樂的感覺，大家可知時裝人背後的心聲？
係咪天生購物狂？
其實我鍾意扮靚，買衫睇衫，個個話我鍾意買衫，我承認，但唔係癲到連沙煲瓦罉都買，我只係鍾意衫鍾意時裝，我條路注定咁行，唔熱愛做戲拍電影，當時有幾多錢都用盡買衫。
有甚麼驅使你踏上時裝路？
個個都經歷過亂買嘢、買錯嘢嘅階段，到三十歲先開竅，時裝先係我真正事業，以前拍戲事業係養活我嘅職業。打工唔啱我，做生意又要睇時機，以前去fashion events畀人話無聊，但其實係低調地鋪路，終於一分耕耘一分收穫，有今日嘅收成期真係好開心。
你對時裝定義？
未必一樣必需品，只係興趣同喜好，當中包含甜、酸、苦、辣，好似大家見到我表面光鮮，但背後係經歷過慘痛，過程同娛樂圈相似，藝人、歌手個殼帶畀你歡樂，背後辛酸就冇人知。依家每季有衫送上門，係用自己血淚史換來，回想當初被當透明、被當「嘍囉」，感覺未受尊重，一啲都唔好受，每人有自己故事，唔努力就冇成果。
合作火花
怎形容自己的style？
非一般！我唔鍾意太女人味，mix & match先最重要。
你對mix & match看法？
我唔介意將平嘢全部襯上身，如果upgrade到平嘢定義我仲有滿足感，好自豪，所以我都鍾意買二手衫。
阿徐與好友Dorothy合資於銅鑼灣開設Liger樓上店，主打歐洲時裝，開業初期仍面對金融海嘯，卻毫無懼意，慧眼入貨令她客似雲來，無疑打了支強心針，開業不足一年便於尖沙咀開設分店。
是否想做港版Maria Luisa？
我好欣賞這位時裝教母，我會努力做好本分，我好開心大家認同我嘅眼光同品味。除了Maria Luisa，法國潮店Colette都是我欣賞店舖之一。
會否推出同名自家品牌？
冇諗過！我比較鍾意做同時裝品牌有關嘅設計工作，好似今次係第二度同bossini合作，參與bossini × M&M's少少設計工作，真係好開心，覺得呢個合作形式會有火花。
秋冬must-have是甚麼？
Fur boots與cape，尤其是Chanel fur boots。
囡囡唔潮
徐濠縈穿衣品味已得到外間認同，經常相機不離手的她總愛與人在網絡平台上分享生活點滴與樂趣，就連囡囡包包（陳康堤）的相片也同享。包包有這位潮媽，人們定必以為她或多或少也遺傳了媽媽的獨到品味與「潮」氣，所謂「近朱者赤、近墨者黑」，有潮媽從旁指導，裝扮衰極有限。誰知……
囡囡有否時尚觸覺？
佢完全冇fashion senses，個個都以為佢有！
囡囡不像你那麼貼潮嗎？
佢只得六歲，乜都亂咁嚟，錯錯哋，總之將所有粉紅色着上身，平時你哋見到，都係我襯架！
你有否fashion/style icon？
冇乜特別，但要講就較為鍾意Kate Moss（姬摩絲）同Chloe Sevigny，佢哋態度好正，女人味得來又有rock味，邪邪哋！我唔係太鍾意正統襯法。
買鞋重傷
每季必買貨品？
鞋，雖然我多sponsor，但自己都會買，係我最重傷，重傷唔係指荷包，而係位（指儲物空間）。
家中設有巨型衣櫃？
相反，一個大衣櫃都冇，一間房已經放滿衫，兩間士多房放鞋都唔夠，仲放到出去飯廳一角，一萬呎都唔夠用。Eason已經有自己個倉放鞋，如果唔係呢行會有節制，唔係錢方面，而係冇咁嘅需要。
怎樣處理過季服飾？
我想搵人做二手衫，但一直都冇實行，我計落都有五年冇丟，生女後根本冇時間清倉，連包包嘅new born衫一樣冇丟。
這趟與阿徐直接對話，覺得這位潮媽不易做，全職湊女之餘，也百忙中抽時間實現理想，發展時裝事業，做一個事業、家庭兩兼顧的時尚女性，真了不起！
Maria Luisa獨具慧眼
被稱為時尚女王的Maria Luisa原名Maria Luisa Poumaillou，其創立的同名Maria Luisa的Select shop於世界各地搜羅潮服與潮物外，其巴閉地方還是獨具慧眼，多年來發掘過許多已成為今日蜚聲國際的設計師，當中包括John Galliano、Rick Owens、Christopher Kane與Gareth Pugh等，故亦有歐洲時裝界伯樂的尊稱。
阿徐的style icon
姬摩絲與Chloe Sevigny的共同點是時裝友眼中潮人。姬摩絲貴為國際名模，現年36歲的她出生於倫敦，14歲時被星探發掘，憑着5呎7吋的瘦削身形打破了當時被高挑模特兒壟斷的局面，結果憑獨有的型格與氣質一炮而紅。
現年35歲的Chloe Sevigny於18歲那年被星探發掘，其自成一格的mix & match備受讚賞，其後更加入設計師行列，深受時尚界寵愛；至95年開始電影生涯，99年更獲得金球獎女配角提名，先後主演的電影有《沒哭聲的抉擇》與《殺迷藏》等，近年更轉戰電視劇集，如《Big Love》等，作多元化發展。
時裝blogger地位超然
寫blog已不是新鮮事，這些寫blog的人俗稱為blogger，近年時尚人都佔上一席位，借助這個平台來發表偉論，將最新最潮的服飾介紹給大家外，更可分享打扮心得。Hilary也認為寫blog、facebook兼微博是大勢所趨，亦是生活的must-have，除有自己時裝店網頁外，也加入了時裝blogger行列，自設個人部落格，向一眾時裝友表達自己的「潮」論。
而這些專寫時裝潮流的blogger亦日漸被重視，正如中國人氣blogger韓火火早前在巴黎得到Chanel厚待入後台，甚至只有十三歲的Tavi Gevison小妹妹也被邀出席欣賞巴黎Christian Dior高級訂造服時裝騷，可見這班blogger地位超然。
採訪：劉慰思
攝影：黃叔榮
服裝：bossini × M&M'S