潮人阿鵬撈得起

食玩幼細芋絲

這間位於坑口的「潮人飯堂」，單是店名就有特別意思，據老闆講可以指新潮的，亦能說是潮州的，不過，無論解作甚麼都好，最緊要有自己風格，或者就是這個宗旨，令餐廳自開業以來經常座無虛席。

阿鵬父母均是潮州人，他說老潮州飲食習慣好傳統，像媽媽每朝會煲潮州粥，但是他說：「我嫌粥嘅質感似漿糊，要加水溝稀嚟食。大家飯後例牌要飲杯功夫茶，多數飲鐵觀音，消吓滯嘛。」自稱新「潮」人，阿鵬除愛傳統潮州菜，也會試創新美食，像他這天便接連品嘗薑汁芋絲撈起、潮州凍蟹、「潮人」紅燒素翅及人氣豬骨粥等，大飽口福。其中，阿鵬對撈起愛不釋手：「正正經經食飯，有時都好悶，倒不如搵啲嘢玩吓，好似呢個撈起，芋頭幾乎切到頭髮絲咁幼細，就知師傅刀功好啦，而且仲可以撈撈吓，有得食又有得玩，食得好開心！」

薑汁芋絲撈起　$38 芋絲非常幼細薄身，足證師傅刀功厲害，還炸得香脆，吃前先將芋絲跟薑汁、蝦米及花生撈勻，味道更佳。	「潮人」乾撈拉麵　$38/碗 從潮州運來拉麵，質感彈牙無鹼水味，淨鵝髀肉配搭潮州鹹菜及欖菜，肥美嫩滑超好食。	潮州凍蟹　$198/隻 凍蟹一般是花蟹，這裏卻換上溫哥華蟹，凸顯其實肉、香甜，不蘸點蒜蓉醋更能食出鮮味。還有法國睡蟹可選，令食味升級。
普寧脆炸布包豆腐　$32 自家出品豆腐，選用加拿大大粒黃豆炮製，每天限量供應。炸得外脆內嫩，食落滑如豆腐花，豆香非常濃郁。	潮州怒漢炒麵線　$59 煙煙韌韌，入口還帶點鹹香味的潮州拉麵，跟魚片、鹹肉、韮菜、芹菜及芽菜等炒埋一碟，特別惹味。	話梅肉鬆明爐烏頭魚　$98 烏頭魚先燒後煮，魚肉不易散掉，還混合青檸、肉碎及話梅等，倣效泰式明爐魚，邊滾邊食香氣撲鼻。

「潮」歎「升呢」凍蟹

「潮州人好鍾意響屋企食飯，感覺溫馨啲。」阿鵬雖然咁講，但忙碌的他卻經常出街開餐，最鍾意打冷。他說：「我不時去荃灣、九龍城附近的打冷舖食嘢，貪佢哋收得夜，方便我放工消夜，必食凍蟹、滷水鵝、掌翼及烏頭等。」雖然鍾意打冷舖有風味，但阿鵬指地方較為簡陋，唔似呢度裝修摩登，可以舒舒服服食餐飯。

據阿鵬講，現在的打冷舖不只有潮州人幫襯，所以，連粵菜都有得食。潮人飯堂亦是「潮」「粵」合璧，但潮菜方面會保留家鄉風味，像沿用獅頭鵝炮製滷水鵝，及「產地直送」的普寧豆腐、潮州梅、拉麵、麵線及醬料等。不過，既是新派餐廳，也愛搞搞新意思，像幫凍蟹「升呢」。阿鵬一見大蟹即讚：「嘩，平日隻凍蟹多數係花蟹，但呢度用溫哥華蟹，味道鮮甜，蟹肉結實，唔使點蒜蓉醋都得！」

陳樹鵬近況

常被指聲音似杜汶澤，但其實好有個人風格，擅長講波講笑講爛Gag。現為電視台主持，負責節目包括《球彩俱樂部》、《超級星期六》、《快樂星期天》及《美食法庭》。

試食報告

環境氣氛：★★★

好味指數：★★★1/2

必食推介：潮州凍蟹、普寧脆炸布包豆腐、薑汁芋絲撈起

人均消費：$150~$200

撰文 ：楊淑英

攝影 ：陳世昌

查詢電話 ：2497 8188