講到受歡迎嘅空戰遊戲，除咗《Ace Combat》系列之外，就要數《Tom Clancy's H.A.W.X》。兩年前第一集《H.A.W.X》畫面靚兼且加設輔助系統，冇玩開空戰Game都唔難上手；《H.A.W.X 2》就追加起飛同降落、空中加油同夜間出擊嘅任務，以為好易嘅動作玩落都幾有挑戰性，其他空戰Game冇o架！
《H.A.W.X 2》故事交由Tom Clancy操刀，遊戲背景夠晒真實。今集將時代設定在近未來2030年，一股神秘新力量在世界迅速擴散，俄羅斯核彈頭被盜加上中東衝突不斷，影響到整個世界嘅安危，各國要急謀對策應付。咁驚險嘅故事透過英國皇家空軍、俄羅斯空軍同美國「H.A.W.X」三支軍隊所經歷嘅戰爭，描述番呢場顛覆世界嘅陰謀。原來實情戰爭係由俄羅斯國家主義者所發動，想趁亂奪取俄國政權再入侵挪威，玩家要揸勻三支空軍嘅頂級戰機完成連場激烈空戰。
玩空戰遊戲最緊要係有真實感。開發小組便聽從玩家對上集嘅意見作出改良，好多玩家都回應想加入起飛同降落步驟，到《H.A.W.X 2》時就真係有得玩。遊戲可在機場跑道或者航空母艦起飛同降落，雖然起飛操作唔算太難，只要沿住地面嘅黃線駕駛戰機到跑道，然後踩油加速到指定速度拉起操控桿就得，但總算有新鮮感。相對地另一個新動作——空中加油就困難得多，要在遠距離瞄準前面空中加油機嘅輸油管就如大海撈針，仲要在限時內完成真係幾有挑戰性。
遊戲運用比Google Map精細幾倍嘅GeoEye衞星地圖，地貌顯示非常精細，在沙漠、高山地形甚至係真實城市（如南非開普敦）都可以清晰地顯示，而且每張地圖都有130×130km咁大，高空追逐戰有排玩。遊戲入面有英國空軍、俄羅斯空軍同美國「H.A.W.X」空軍任務，當然有大量真實戰機，如F-16C Fighting Falcon、F-22 Raptor、F-35 Lightning Ⅱ、Su-37、Eurofighter Typhoon，到經典嘅F-117 Nighthawk同F-14A Tomcat都可以畀大家四圍舞。最正係遊戲支援4人合作或最多8人連線對戰模式，如果用埋專用飛機手掣就玩得更爽！
類型：空戰
開發：Ubisoft Romania
平台：Xbox 360、PS3
推出日期：9月2日（Xbox 360）9月9日（PS3）
售價：$359（Xbox 360）$388（PS3）
查詢電話：2359 7998
撰文：布偉倫