吸油紙上燒羽翹放心食

歌手羽翹（Ava）以靚聲紅爆互聯網，原來教美容、化妝亦有一手，早前就出書講解秘技。吸油爽膚當然難唔到Ava，換轉幫食物「吸油」，佢就推介一間大賣「紙上燒」的新餐廳，一張白紙即令肉類、海鮮燒得嫩滑美味，而且質感乾爽，不油不膩，可以放心大啖食！

夏日炎炎，好容易令人油光滿面，Ava就教大家如何潔膚爽膚：「有面油是因為肌膚乾燥，天氣愈熱，面油就愈出愈多。大家不妨噴點保濕水，用紙巾抹乾後再補粉，治本方法則是多敷保濕、深層清潔Mask。」見Ava講得咁好，小記就再請教如何幫食物「吸油」，她即時介紹位於灣仔的新餐廳Kushi One。

話說餐廳老闆張先生曾在日本北海道品嘗紙上燒，即覺驚為天人，並引進及改良這創新食法，像以電磁爐代替明火，減少油煙，然後在特製的雙層鍋鋪上吸油紙燒烤，將肉類、海鮮的肉汁鎖住，入口分外嫩滑美味。Ava即席試燒，很快便傳來陣陣肉香，而堅韌的紙張能抵擋高溫，將烤肉、海鮮燒得外皮微焦，更加吸引。

自言極愛日本菜的Ava，經常同朋友食串燒、Shabu Shabu及日式烤肉等，最愛那熱鬧、輕鬆的氣氛，分享美食特別滋味。餐廳除以紙上燒作主打外，亦提供不同和食，包括卷物、串燒、刺身等，由二十多年經驗的和師傅坐鎮，更創出如玫瑰花壽司杯、和式黑松露溫泉蛋沙律，以及熱食的神串一壽司酥皮卷等，甚有心思。

見Ava今餐開懷大嚼，其實她平日食得檢點，因要保持最佳身形。她笑言：「平時喺屋企食少啲，又比較清淡，但一出街開餐就唔理咁多，食咗再算啦。」Ava視飲飲食食為樂趣，是一大減壓良方：「最怕人哋用熱水淥去食物油分，無晒味道，睇見就唔想食。如果係食紙上燒就無問題，有吸油功效，點都食得放心啲。」

汁燒黃太子免治雞肉棒　$18 以新鮮韮菜、鹹蛋黃（即黃太子）、洋葱及雞蛋，經師傅反覆手打而成，非常彈牙入味，每天限量炮製。	神串一壽司酥皮卷（熱）$88 入口熱暖暖的壽司，內藏芝士、牛油果、香杧及北海道長蟹肉等，外圍包着酥皮後烘焗，很有新鮮感。	和式黑松露溫泉蛋沙律　$68 用上多種醬汁炮製，包括黑松露油、胡麻醬、意式沙律油等，層次分明，當中以黑松露油配溫泉蛋最美味。
兩款特飲Mango Manila（左）以橙汁、杧果醬及甘巴利莓汁調製，酸酸甜甜，而Kushi One Special（右）則以荔枝為主，新鮮荔枝、荔枝醬再配西柚汁等，清新宜人。	餐廳大廳布置以綠色為主，設卡位坐得舒適，而這貴賓房則自成一國，布置別具風格，品嘗美食更自在。