稱「盜墓者羅拉」為其中一個最深入民心嘅遊戲女主角，相信冇人反對；但在新遊戲《Lara Croft and the Guardian of Light》入面，就飛走沿用嘅「盜墓者」（Tomb Raider）系列名稱，換上新形象再上陣。既然今次講到明要玩新鮮感，所以唔使單拖上陣，仲有個瑪雅族戰士幫手，再用全新45度角俯視觀點玩，夠特別未？
以Lara Croft個名掛帥嘅《Lara Croft and the Guardian of Light》遊戲仍然結合動作同解謎，在廢墟入面冒險。今集故事發生在中美洲叢林廢墟，講述 Lara捲入一場場爭奪神秘力量魔鏡嘅戰鬥之中，喚醒沉睡二千年嘅邪靈同不死族，奪寶之餘又要面對古文明邪靈嘅挑戰。近期好多新Game都將以往單人匹馬「Rambo」式冒險玩法轉為雙人合作，呢套新遊戲都唔例外，除同樣着緊身背心加熱褲嘅Lara之外，仲有個新男角Totec登場幫手。睇見Totec一身造型，都估到係瑪雅族戰士，佢原本係光之軍隊（Army of Light）領袖，由開頭怪罪Lara帶來麻煩，到最後攜手合作。
在雙人模式或者連線模式入面，兩個玩家可以分別操控Lara或者Totec，Lara仍然用佢兩把手槍同繩索，而來自二千年前嘅Totec就只會用長矛，不過玩到中後期，Totec亦學識用現代武器。在雙人模式入面，Lara同Totec有唔少合作機會，當然亦要合作成功先可以過關。例如，Totec將盾牌放在頭頂，Lara企上去居高臨下；Totec亦可以運用Lara的繩索越過深谷或隙縫等。兩個角色充分合作固然好，不過遊戲開發商亦加入咗要兩個玩家鬥搶分嘅設計，拎得高分嘅玩家先可以開隱藏寶物，所以有時自私少少都冇辦法。
遊戲另一項新設計係一改以往《Tomb Raider》嘅3D動作模式玩法，而換上45度俯視角度固定視點，對於新手嚟講更易上手，而且雙人合作亦較易處理。對於更方便玩家嘅設計係今集會用下載方式發售，先行推出嘅Xbox 360版可在Xbox LIVE Arcade買到，只係百零蚊港紙，都幾抵玩。售價雖然平，但遊戲畫面其實都唔差，仲用上《Tomb Raider: Underworld》嘅遊戲引擎，中美洲叢林、地底同地心場景都有出色設計；而且以單人模式完成時間約10小時，兩人合作模式約8小時去計，絕對合格有餘。
類型：動作
開發：Crystal Dynamics
平台：Xbox LIVE Arcade
推出日期：8月18日
下載費用：1,200 MS Point（折約$120）
網址：www.xbox.com/zh-hk/
撰文：布偉倫