港美日漫畫iPhone睇晒！

撰文︰陳志滔 攝影︰盧展程

模特兒︰Kinki（Pure Models）

《老夫子》耐人尋味 售價︰免費

老夫子、秦先生同大番薯風靡華人社區近半個世紀，如今終於由繪本跳到iPhone屏幕。程式為《老夫子》的精裝本，有王澤為書畫封面、彩稿漫畫及重畫大部分當年的黑白漫畫，App Store更有整套《老夫子水虎傳》下載，若當年冇睇電影，依家可以重溫了！

《風雲Ⅱ》有聲有畫 售價︰免費

香港唔少七、八十後都係《風雲》擁躉，由初期漫畫追到電影版，依家再追埋電子書！表面上，《風雲Ⅱ》只係將文繪版移植過來，但最過癮係每頁都有幾格分鏡可以播片，例如海鷗飛過、雙劍互劈等，部分還有聲效，睇得更盡情。官方更謂將來會把服務推廣至整套《天下畫集》，死忠Fans一定要留意！

《漫畫之新聞》漫遊日本 售價︰免費

日本係漫畫王國，估唔到連新聞都可漫畫化。《漫畫之新聞》請來日本50位著名畫師，把每天發生的政治、時事、經濟、社會及科技新聞繪畫成漫畫，並配以有趣人物及生動字句，讓讀者更易吸收。既學到日文，又能知道日本時事，是《讀賣》、《朝日》以外的另類選擇。

《Comics》動感播放 售價︰免費

隨住《鐵甲奇俠》等英雄電影大收，唔少人想摷翻原著嚟睇，不過香港賣美國漫畫嘅地方唔多，好彩依家透過《Comics》都買到。程式集結DC Comics、Marvel等多間知名出版社，藏書量超過2,000本，最正係全部漫畫都經過Guided View技術處理，懂得自動縮放分鏡之餘，還能一格一格地順序播放，帶來嶄新的閱讀體驗。

自學技法《How2Draw Manga》

睇得漫畫多心癢癢想畫番幅，但又欠缺基本功？唔想出醜人前，可透過這款《How2Draw Manga》磨練畫功。程式由巴西著名漫畫家Fabio Yabu設計，以清晰簡單的介面，展示男女生不同角度的基本繪畫技巧，每個角度都有技巧、圖畫及文字說明，畀你一步一步成為畫壇大師。

售價︰0.99美元（折約港幣$7.7）

直讀漫畫《iComic Viewer》

《iComic Viewer》是一款漫畫閱讀器，它能夠讀取CBZ或ZIP漫畫檔案，然後把內裏的圖片解壓出來，因此只要找到檔案，就咩漫畫都有得睇！程式支援放大、縮小及全屏幕顯示，並可預設漫畫的開始位置，左上角或右上角位置任揀，就算中、美、日漫畫排版不同，都一樣睇得到。

售價︰免費