殘爆鐵頭六

首見三角嘜心口

雖然Hot Toys前前後後已製作過多款Iron Man，但既然Mark VI貴為最終形態，廠商亦當然沒有馬虎了事，無論Body還是細節位都重新大執過。首先心口核能裝置由圓形變成三角形，能跟雙眼及雙掌一齊着燈。另外，兩隻前臂各多一支Laser炮，手掌只要微微向下曲便會自動彈出；廠商更想過在此加入LED燈，只是顧及安全問題最後才取消掉，否則雙臂一伸便能重現大絕招一幕。

比歷代更傷

頭雕方面，今次繼續由韓籍大師Kojun操刀，從過往作品中，可預期有一定神似度，惟現階段尚待羅拔唐尼及電影公司審批，因此拍攝當日仍然「無面見人」。然而玩得Iron Man預咗長期笠頭盔示人，計我話造型多變仲實際。這次Mark VI便絕對滿足粉絲需要，出廠時頭像、胸甲都布滿傷痕及子彈窿，部分關節還有零件外露，論損毀程度，比以前出過嘅「戰損版」還要嚴重得多。

Mark VI最大分別係心口個「三角嘜」標誌，並跟以往一樣可以亮燈。留意胸甲還可整塊拆走，露出內部零件。

放大圖片

VIP送左前臂

若嫌以上重手得滯？唔怕，隨盒還有多組冇花痕嘅正常版配件，包括一個頭像、胸甲、整隻左手及大腿護甲等，只要換齊便可變回正常造型。特別一提，凡VIP會員購買還可獲得左前臂一隻，雖然用唔番落Mark VI身上，但可套喺其他TrueType Body上玩「洛克人」造型。配件方面，送4對可換手掌係指定動作，最正係地台重新設計，上方有「嘍囉」機械人Navy Drone攤屍在此，跟足電影場景設計。

提供「正常」及「戰損」兩個頭像，只要揭開前者面蓋，就可以見到Tony Stark個樣，不過面相仲等緊佢老哥審批。	送兩條左手，兩者都用Ball-joint連接Body，接合唔困難。	送4對可換手掌及專用地台，後者有Navy Drone殘骸，跟足電影場景。

撰文︰陳志滔　攝影︰郭凱敏

Mark III戰損版嘅雙臂只有少少傷痕，今次連零件都露埋底，比以前「傷」得多。	腹部並非一件過啤膠，而是設有關節可以摺腹，彎腰擺Pose更靈活。	手腕微曲就會彈出Laser炮。

查詢電話︰2388 4677