婷婷晒腿欣宜未驚過

謝婷婷與鄭欣宜這對由細玩到大的兒時玩伴，雖然相差六年但感情要好，兩人獲Levi's垂青拍攝最新的Curve ID牛仔褲，此外，品牌還會邀請廖碧兒、吳雨霏、何韻詩及徐濠縈拍攝。昨日婷婷着上超短牛仔褲騷長腿，展示野性一面，而欣宜則作男仔頭的中性打扮。

飲食依足營養師

欣宜表示首次與婷婷一起拍照，問她若要效法婷婷着熱褲有否信心？她笑言：「有photoshop我冇咁驚，同埋我大腿唔係好肥，不過平時都好少着短褲。」至於今次邀請了不少索女會否怕被比下去？她信心十足地說：「都唔係最驚，因為今次嘅牛仔褲係展示大家不同的線條美態。」修身成功的欣宜，表示希望再瘦多幾磅，又坦言中學時試過扣喉減肥：「不過呢個係自殘嘅方法，嗰時以為係最容易、最簡單嘅方法，但其實係最傷身，後來被朋友發現阻止。」欣宜表示現在飲食方面會根據營養師的指示，已戒食煎炸食物多時，但最愛的朱古力，有時仍會忍不住口，不過只食黑朱古力。

欣宜與婷婷這對兒時玩伴，難得一齊合作。

欣宜作中性的男仔頭打扮，仍信心十足。

禁父母男友探班

而婷婷表示欣宜拍照前一天還約她食晚飯，不過為保持最佳狀態已遭她拒絕，問她平時點keep fit？她謂：「以前讀書都有baby fat，但我參加好多運動，成日要keep住食香蕉及意粉練肌肉，而肌肉要減好容易。」至於拍戲進度，她說：「拍咗一場戲，對白改過三次，最終自己唔使講對白，（男友陪你？）佢陪咗我五日，不過我怕醜唔畀佢入片場，佢只可以留喺酒店，爹哋媽咪都話嚟探班，但我話要適應吓先，驚受影響，明明自己可做一百分，驚佢哋喺度自己做得冇咁好。」

文：名人組