老友SOS，小妹當然兩脅插刀，在所不辭，馬上飛車到現場了解。剛好，老友聘請的第三個陪月又報到了。
這位陪月阿姨好似好Pro，又話BB不能在睡房洗澡，因為空間太大，要在浴室洗並關上門，避免BB着涼。又滑稽地用廣東話吩咐菲傭清潔乜、清潔物……雞同鴨講，菲傭當然唔明佢講乜啦……行家一出手，便知好唔好。好啦，埋身開工換片，陪月阿姨毫無準備，埋位就做，手勢尚算純熟，但衞生意識低，舊片隨地掉，BB的新片、乾淨衫喺邊，佢都未知，幸好有菲傭幫吓手，終於符符碌碌換掂咗。
與老友到大廳歎杯茶，再一同入BB房，見BB被數條毛布包實，再加兩張被仔，咁誇張？再睇睇，冷氣開到22℃，有無搞錯？我調校到25℃，跟着拿走遙控，不再讓阿姨亂搞。
過了一會，阿姨跟老友說要叫醒BB飲奶，老友奇怪，BB瞓得好地地，何解要把BB弄醒？呢個阿姨大條道理話夠鐘就要食，否則BB遲食奶，就會遲咗瞓，咁連阿姨自己都無得瞓o架啦。
我和老友睬佢都傻，睇埋佢幫BB沖涼先算。唉，個阿姨講就無敵，幫BB反身洗背脊時，BB飲咗水，佢都未知！
唔炒點得？
註冊女中醫