小志強造水晶盃祝荷蘭捧杯
四年一度足球盛事下星期正式展開，就算飛唔到去南非，一樣可以為心愛球隊打氣！好似就讀喇沙書院的學界神射手方柏倫，就親手學整水晶玻璃杯，畫上熱捧的荷蘭隊和足球圖案，然後燒成獨一無二的足球杯。去麥記換杯就換得多，冇諗過自己親手造原來既要耐性又講技巧，同踢波練習一樣需持之以恒。
喇沙小志強難忘甲組入球
今年勇奪Division 1團體冠軍的喇沙書院，是每年學界足球的熱門球隊，隊中前鋒、現踢乙組深水埗區隊的方柏倫同學，自然成為狙擊目標，每場一攞波就有幾個人夾擊，慘過美斯被抽水，往往需要爆入禁區個人突破。亦由於他力量速度兼備加上黑黑實實外形，被起了個花名叫「喇沙小志強」。成人身份證都未攞，今年在足總盃對謝菲聯便取得入球，難怪幾間甲組球會都想搵佢過檔。
南非足球盛事欣賞史奈達
未知是否與《足球小將》有緣，連他最愛的球星都叫史奈達（漫畫：卡爾軒斯•史奈達），不過這位史奈達（Wesley Sneijder）卻是今年助國際米蘭成為三冠王的中場核心。「我最欣賞史奈達在球場控制比賽節奏，無論交直線或射罰球都相當出色。」柏倫一提起足球便滔滔不絕，只是當年史奈達18歲踢荷甲，香港學生要兼顧讀書和踢波似乎更困難。「依家每星期練4天再加兩天比賽，差唔多每日放學就去踢波，惟有開波前在更衣室溫習做功課。」
水晶玻璃鑄造歷時多星期
柏倫既然封史奈達做偶像，今屆梗係捧番荷蘭。為圓粉絲心願，今次特別跟雕塑導師余衛萍老師學做水晶玻璃，望荷蘭隊一嘗宿願捧盃而回。
今次試做Glass科的暖工製作，其實人造水晶和玻璃同屬這一科，只不過兩者含鉛度和折光率不同，水晶在做模、注漿、塞臘等步驟後，將彩色水晶料入窰溶解定形，所以成品看上去已混合多種顏色；至於玻璃則在表層髹上各種顏色的玻璃釉彩再放入窰燒。柏倫試完後話睇落去好似好容易，但原來各個微細步驟都很難控制，搞到「彩繪」時唔上色、畫到圖案變形，好彩現場有老師執手尾才能完成製作。
玻璃彩繪
Step1：「彩繪」較適合入門者學習，基本有畫筆和玻璃彩釉（顏色粉）便可以。但要留意如玻璃杯太薄的話，需事先灌漿鞏固內部，否則燒出來杯身會倒塌。
Step2：事先用酒精清潔杯身，再用Marker預定所需圖案，便可用各種顏色的玻璃彩釉髹上去。但要留意水分太多會好難上色，甚至流到周圍都係。
Step3：入窰約需3天時間，升溫至650度便需要4~5小時，第2天進行降溫，待第3天至室溫便完成。
中大專業進修 備短期課程
香港真正做立體藝術品的工作室並唔多，「金與土雕塑訓練中心」便是雕塑家文庭先生於1968年創立，現由余衛萍老師承繼授徒，最近便在中大專業進修學院開設《水晶鑄造藝術入門》短期課程，讓學生由造型、燒製到打磨等工序，塑造自己的立體水晶作品。此外，各位亦可像柏倫嘗試《玻璃藝術綜合技巧》，親手製作獨一無二、色彩鮮艷的玻璃，當作暑期活動亦是不錯選擇。
水晶鑄造藝術入門
開課日期：2010年7月25日
節數：10講
上課日期：星期日2:00pm~4:30pm
學費：$1,920
備註：限收12人（學員需負擔材料費）
查詢電話：2209 0244
玻璃藝術綜合技巧
節數：每星期1堂（3小時）
上課日期：學生自訂時間
學費：$1,650（每月）
備註：學費已包材料
查詢電話：3527 0614
小檔案
姓名：方柏倫（17歲）
外號：喇沙小志強
學校：喇沙書院
球隊：深水埗區隊、香港U17代表隊
曾獲獎項：曼聯超級盃MVP、Nike五人足球賽神射手、學界足球冠軍
撰文：鍾鎮科
攝影：梁偉德