靚靚嫌老公毒唔想造人
袁詠儀（靚靚）與老公張智霖一直希望做第二任父母，早前兩人到巴塞隆拿旅遊，原本想努力造人，卻遇上生理時鐘不協調。而靚靚又指老公早前做完鼻手術後，還在食抗生素，要等他排清毒素才造人。
前晚靚靚以「愛心大使」身份出席自閉症兒童基金協會舉行的「燦爛的微笑」慈善晚宴，其他出席嘉賓還有唐素琪、伏明霞及琦琦等。
唔相信有意外
靚靚透露剛與老公張智霖到巴塞隆拿旅行，記者笑問可有積極造人？她笑說：「話咗造人好耐o架啦，不過原來要特登造係好難o架，因為唔係淨係夾兩個人嘅時間，仲要夾埋生理時鐘囉，（月事掃興？）之前嚟咗，係時間唔啱，加上老公個鼻做完手術仲食緊抗生素，我都唔係好敢造人，等佢排晒啲毒先，都想個BB健康啲，總之依家我就放鬆心情，順其自然啦！」
至於可會擔心有意外？她即瞪大眼說：「我從來都唔信意外呢啲嘢，咁大個人點會唔知？意外只會發生喺十幾歲嘅年輕人身上，（李克勤話佢第二胎都係意外喎？）咁佢後生囉，我好唔鍾意啲人用懷孕嚟箍住段婚姻！」
囝囝對性好奇
問到會否待囝囝十多歲時灌輸性教育？她說：「會再早啲同佢講，依家啲人太早熟，我個仔都開始好奇，成日指住我個胸問『點解你有我冇？』又會喺街度揭我條裙扮BB。」
而同場的琦琦就透露剛與老公任達華到北京工作，問到做了影帝後的老公會否更繁忙？她說：「其實做咗影帝只係心情開心咗，工作同以前一樣咁忙，嚟緊父親節佢都要去北京拍戲，我都諗住帶個女去探班！」 文：名人組