與蝶同行

隨着石屎森林嘅版圖無止境地擴張，喺香港見到蝴蝶嘅機會愈來愈小，甚至有小朋友自出娘胎都未見過蝶舞。趁春暖花開，走入位於大埔嘅蝴蝶天堂，超過200種蝴蝶恭候你。

孕育蝴蝶 200多種

睇飛蝶要講Timing，太熱或太冷嘅日子都唔適合，每年3月至11月都係賞蝶嘅理想月份。位於大埔鳳園谷嘅鳳園蝴蝶保育區，更加係睇飛蝶最正嘅地方！

保育區由大埔環保會成立，區內有一片繁茂嘅風水林，加上昔日嘅耕作活動，營造出一處多樣性嘅生態環境，為蝴蝶嘅幼蟲和成蟲提供了合適嘅孕育條件。現時區內可以搵到超過200種蝴蝶，佔全港蝴蝶品種嘅8成！

燕鳳蝶 世上最細

常見於保育區嘅蝴蝶共有10科，包括鳳蝶科、粉蝶科、斑蝶科、環蝶科、眼蝶科等，若講到最特別嘅蝴蝶，非燕鳳蝶及裳鳳蝶莫屬。

燕鳳蝶係世上最細嘅鳳蝶，翅展寬度僅40至50mm，其前翅嘅中央部分呈透明，後翅嘅形狀則同燕子尾巴相似，因而得名。燕鳳蝶係受中國政府保護嘅蝴蝶品種，地位等同國寶熊貓。至於裳鳳蝶係全港體形最大嘅蝴蝶，翅展寬度約120至140mm，相當於一位女士嘅手掌咁大，沒有翅尾，前翅以黑色為主，後翅多呈金黃色，早被列入香港「野生動物保護條例」受保護品種。

飲食習慣 睇真啲

除咗欣賞蝴蝶翩翩起舞嘅姿態，保育區內亦種植了不少吸引蝴蝶嘅農作物，如假馬鞭、馬纓丹等。原來蝴蝶嘅飲食習慣好獨特，每一種蝴蝶只吃一種植物，其寄主植物（即是供不同蝴蝶幼蟲食用嘅植物）亦各有不同，例如斑蝶嘅寄主植物有娃兒藤、夾竹桃；鳳蝶嘅寄主植物係桔、柚、白蘭等；蛺蝶嘅寄主植物係巴豆、杧果等；眼蝶及弄蝶嘅寄主植物有剛莠竹等。走入保育區，大家就會更加了解蝴蝶嘅生活習性，比起睇書生動得多。

賞蝶備忘錄

時刻注意自身安全，留意地面高低，提防毒蛇、野豬偷襲。

做好防蚊措施，宜穿長袖衫和長褲，切勿噴香水。

不要為接近蝴蝶而踐踏植物。

尊重生態的自主及自由，切勿隨地收集任何動物標本。

鳳園蝴蝶保育區參觀須知

地址：大埔汀角路鳳園路150號

開放時間：9:30am~5:00pm

參觀形式：個人參觀不設生態導賞，分為全年會員（成人$200/位）或臨時會員（$20/位，作即日參觀）。

查詢電話：3111 7344

撰文：黎雅麗

部分攝影：黎劍華

鳴謝：潘瑞輝先生

模特兒：Phoebe、Henry（Talent 100）、Justin