戲院內蠔氣開餐

3D電影熱爆,近期又有好戲連場,令戲院即時人氣極盛。既然對睇戲有要求,無理由開場前食熱狗、爆穀醫肚啩?不如學有線娛樂台主播譚凱琪(Zoie),到戲院內的新餐廳「蠔」食一餐,歎生蠔、熟蠔及意大利飯,甚至將小食帶入戲院,感覺超爽!

精選當造生蠔

位於UA太古城中心內的新餐廳03,可謂佔盡地利,買完飛行過兩步就到,即使唔睇戲亦可入去食飯。小記查探過,得知它屬炮台山Oyster3的姐妹店,當然以靚蠔做主打。Zoie自言愛食蠔:「我耐唔耐就去蠔吧食飯,高峰期試過一個月三次,最鍾意食細細隻、質感爽的,或揀有齊唔同品種的生蠔拼盤。」

餐廳每日約有十款生蠔供應,老闆Felix表示當造的有法國、南非、愛爾蘭及蘇格蘭生蠔,還會不時按產地轉換。Zoie叉起生蠔品嘗,生蠔群邊即時縮起,非常新鮮,配杯白酒就更正,Felix即時教路應配帶點酸味的白酒,因果香味太重的話,其甜味便會蓋過蠔味,變成喧賓奪主。

買小食入戲院

如果不嗜生蠔,大可改選「熟蠔系列」,當中包括白酒乾葱蒸蠔,煮法帶中菜影子,特別入味之餘,還散發微微酒香,卻沒焗蠔、炸蠔的油膩。餐牌大致跟炮台山店相同,所以會供應沙律、湯、漢堡包、意大利飯及甜品等,見Zoie試食時心情興奮:「三色無骨雞鎚好得意,可以一啖食落肚,另外,馬拉蜆夠大隻,肉質爽甜,用啤酒汁去煮,好有新鮮感。」

平日去睇戲,通常會話嚴禁帶「非本戲院售賣食物」,可惜一般小食部選擇太少,但這裏就吸引得多,因大家除可在餐廳內開餐,亦可將食物買進戲院。戲院方面補充話:「只要食物沒有醬汁、沒有殼及沒有骨,便可以買入戲院食,生蠔要坐低慢慢歎,當然係響餐廳開餐最好。」

撰文:楊淑英

攝影:梁偉德

查詢電話:2907 0093