40格連拍！EX-FH100打雀拿手

唔少龍友打雀都鍾意帶支小黑小白去，貪佢打得遠又夠Sharp，不過支鏡又長又重，雀仔企定定還好，若高速飛行實影唔到。好彩近年好多DC仔都有唔錯嘅連拍能力，好似Casio新機EX-FH100就突破性支援40張連拍，就算要影海洋公園隻「地中海隼」都毫無難度！

影得我靚啲！唔該！
售價︰$3,480

存相冇時滯

好多DC仔都有連拍功能，但頂多拍到12~15張相片，講真只算聊備一格。Casio早於年前的半專業機EX-F1植入60張連拍功能，如今移植到機仔EX-FH100身上，都維持到每秒40張，速度連好多DSLR都望塵莫及！有咁嘅紀錄，全靠內置High Sensitivity CMOS感光元件，對光線特別敏感，即使快拍時唔夠時間曝光，相片都唔會矇查查。另外，在85.9MB快閃緩存幫助下，存相一樣快，影完相冇乜時滯，加上按快門前可預先影定30張相，就算隻「隼」飛得幾快都走唔甩！

1,000fps極速拍片

既然以連拍作賣點，EX-FH100亦物盡其用，很多Best Shot模式如「小孩」、「寵物」等都預設了連拍速度，用家毋須手動調校，至啱初學者。個人至Buy佢個「高速連拍照明效果」，連拍3張時會記低標準、明亮及昏暗三種不同曝光情況，然後結合修正，令相片光暗更自然舒服，比用Photoshop後期執相方便得多。除了影相，佢嘅拍片能力都好強，拍到720p高清片之餘，仲錄到1,000fps極速影片，重播時物件猶如慢動作一樣，好似影水母暢泳，就連水花都能完全捕捉，簡直大開眼界！

提供銀、黑兩色，情侶可以一人一部玩互拍。24mm鏡頭夠晒廣角，但光圈得f/3.2就唔算大。	用SD卡作儲存媒體，不過若想存相快啲，建議用快卡。	機背有個拍片切換掣，一撥便可由常速變成高速拍片，唔使入Menu，好方便。
快門鍵隔籬是連拍掣，可在單張及連拍之間作切換。	除了每秒40張，還有每秒7張、15張、30張等速度調校。	拍片有多個速度選擇，惟留意1,000fps時解像度會降至224×64，想高畫質就要校慢啲。
內置多個Best Shot模式，大部分都預設了連拍速度。	海洋公園實地測試內置電子防手震，就算吊車搖晃不定，Model一樣冇鬆郁矇，膚色仲好自然添！	用240fps拍水母，水花及軌迹如逐格重播般，好神奇！
開啟40張連拍影海盜船，乘客嘅驚慌表情睇得一清二楚。