老虎女周汶錡（Kathy）今年犯太歲，她一於冇有怕，因她每逢年初三都會去拜神求平安，加上她人生觀積極，深信凡事都要靠自己努力，絕不聽天由命。新一年她已滿腹大計繼續為慈善出力，把愛心分給有需要的人。
年初三「赤口」，Kathy到圓玄學院拜神兼攝太歲，這個習慣已經維持五年，她說：「這是中國人習俗，我細細個就跟媽咪去拜神㗎喇。我嚟呢度係覺得環境舒服，地方大，唔會好逼人。（求啲乜？）都係求新一年平平安安、健健康康。」
祈福攝太歲
她還說：「我唔會祈求要大富大貴，呢啲冇得求，要靠自己努力，從來冇不勞而獲。就算今年我犯太歲都唔驚，犯太歲唔一定唔好，只係指今年會有轉變，同埋我會攝太歲，都係求安心，感覺做咗好過冇做。」Kathy對拜太歲十分熟悉，甫到場便買了份寶牒，依足次序上香拜神，並誠心祈福，之後，還到一個慈善義賣攤檔捐錢，和買了些賀年小飾物，充滿愛心。
由環保做起
問及Kathy的新年願望，她說：「希望唔好有咁多天災人禍，啲疾病遠離我哋，人人都健康，仲有大家為環保再做多啲，一啲日常生活做到嘅，好似減少用紙，垃圾分類我都有做，從小處做起，每人都出分力就幫到好多。買賣二手衫又或捐出舊衫都係環保嘅一種，盡量唔好浪費。」
已決定將今年所得的利是錢全數捐予慈善機構的Kathy，在新一年將會繼續積極行善，她說：「之前同妹妹一齊捐錢喺廣西重建嘅校舍已經完成，今年會抽時間去做探訪，睇吓仲有咩可以幫手，為有需要嘅小朋友助學。」
文：名人組