曾演出日本片《大逃殺》及荷里活片《標殺令》的日本女星栗山千明，日前來港宣傳動畫片《機動戰士高達UC》接受訪問，她表示去年底訪港出席活動，因言語不通未有跟鄧麗欣（Stephy）好好交談，但卻大讚對方非常可愛！
栗＝栗山千明 記＝記者
記：去年底你來港碰上Stephy，覺得對方如何？怎樣溝通？
栗：由於言語不通，所以我當時都冇乜同佢傾偈，但佢好可愛，好cutie！
記：今次來港宣傳動畫片《機動戰士高達UC》，本身係咪高達迷？
栗：其實我冇睇晒所有《高達》系列動畫，不過童年時同阿哥一齊睇過，《高達》對我嚟講都算係回憶嘅作品。至於今次呢部《高達UC》，我都睇過DVD，畫功好靚。
熱愛挑戰
記：今次《高達UC》主題曲《流星的眼淚》係你唱，點解依家先出碟？
栗：做演員都做咗好長時間，我一直都希望嘗試新挑戰，所以同經理人講想試吓唱歌，佢就幫我安排！
記：演員同歌手邊樣比較困難？
栗：兩樣都鍾意，做演員可演唔同角色，做歌手就可唱好多唔同風格嘅作品。不過，當然係唱歌比較難，因為我唱歌嘅經驗較淺。另外，我對作曲都好有興趣，覺得唱自己創作嘅歌會更加容易投入。
否認冷傲
記：你畀人嘅印象好Cool，私底下性格係點？
栗：好難答呢！其實我本身唔太Cool，只係一個普通25歲女仔，係因為經常演啲好Cool嘅角色，至畀人有咁嘅錯覺。
記：情人節快到，會唔會親手整朱古力畀人？
栗：我未試過整朱古力，不過會買畀身邊啲男同事。
記：咁你情人節係咪收過好多朱古力？有冇一啲難忘經歷？
栗：又冇喎！不過記得小學一、二年級嗰時，買咗啲好便宜嘅朱古力，諗住送畀隔籬位好熟嗰位男同學，後來因為覺得尷尬，所以冇送到，自己食番。
恨做性感美女
被問到 除了《高達》之外，還喜歡哪部動畫，以及最想演哪個動畫的真人版時，栗山千明想了一會後笑說：「如果講咗出嚟，通常都唔會成事，不過我就想做Clamp嗰套《xxxHOLIC》嘅『侑子』，同埋《海賊王》嘅Nico Robin。」無獨有偶，栗山所揀的兩個角色均是打扮非常性感的美女！
文：外娛組 場地：the mira Hong Kong