論遊戲畫面同動作設計，《Dante's Inferno》幾似PS平台「God of War」系列，但講噱頭，筆者就撐呢款《Dante's Inferno》。遊戲背景以十三世紀意大利詩人但丁文學巨著《神曲》做藍本，講述身為十字軍的主角為救愛人，深入九層地獄打死神，齋睇華麗場景同角色造型都已經值回票價！

但丁《神曲》做藍本

但丁《神曲》描繪的地獄世界同中國人的十八層地獄唔同，只得九層，由凌波煉獄（Limbo）、淫慾（Lust）、貪吃（Gluttony）、貪婪（Greed）、憤怒（Anger）、異端（Heresy）、暴力（Violence）、欺騙（Fraud）及背叛（Treachery）組成，遊戲開發小組為每版創造唔同場景、角色同頭目；而且每版均有特別點子，好似由眾多亡魂造成的「鬼山」，要諗計開機關先能夠通過障礙物及懸崖，好玩過一味攻擊的齋動作遊戲。開發小組更找來著名編曲家Garry Schyman為遊戲編製「地獄樂章」，打機時記得開大喇叭聽埋背景音樂。

探討公義救贖

開發小組將《Dead Space》成名的動作處理技術放於《Dante's Inferno》，加上能顯示到每秒60格畫面，就算是巨型頭目出場，又或者被亡靈圍剿時，畫面亦保持流暢。主角入地獄時只得大鐮刀及十字架兩款武器，要靠升級先學到新招及用到更強武器。不過遊戲重點並非擺在「遇鬼殺鬼」上，而是更為重視探討公義及救贖問題，打亡魂時可以救贖其靈魂，又或者令佢永不超生，直接影響到玩家的「神聖」（Holy）及「邪惡」（Unholy）兩大屬性，繼而所學到的技能亦會不同；說穿了其實即係任揀正邪兩道。最後要提一提玩家，部分遊戲畫面都去得幾盡，「18+」先買得到。

類型：動作冒險

開發：Visceral Games/Electronic Arts

平台：PS3、Xbox 360

售價：$329（Xbox 360普通版）、$349（Xbox 360特別版）、$399（PS3特別版）

推出日期：2月9日

查詢電話：3166 6001

撰文：布偉倫